Къостай берæвæрсугон исфæлдистадæ
Зундгонд поэти игурæн бони 167 анзей кадæн
Ныббар мын, кæд-иу дæм мæ зарæг,
Кæуæгау фæкæса, мыййаг, —
Кæй зæрдæ нæ агуры хъарæг,
Уый зарæд йæхи фæндиаг!
Æз дзыллæйæ къаддæр куы дарин,
Куы бафидин искуы мæ хæс,
Уæд афтæ æнкъардæй нæ зарин,
Нæ хъуысид мæ кæуын хъæлæс.

Къоста – ирон историй дессаг фæззинд. Алли адæми хатт дæр æносæй – æносмæ архайуй, æ уедæгтæ Хуцауи рази сау зæнхи арфдæр рауадзунбæл, æ дзилагæ ниффедар кæнунбæл, æ фарнæ, æ хузæ рæсугъддæрæй равдесунбæл. Уомæн берæ мадзæлттæ ес: фарнæ, æгъдау, зунд, раст цард, фæллойнæ, æхсарæ, лæгдзийнадæ, ахур… Фал кæд аци гæнæнтæ берæ ахедунцæ, уæддæр æнхæст фагæ нæма ʼнцæ дзилли цæсгом æнæгъæнæй равдесунæн. Фал еу доги æрцæуй уæхæн афонæ, æма фæззиннуй адæми цард фæрнгундæрæй ка ниффинса, æнæгъæнæ дзилаги уод æма зунд равдесуни тухæ кæмæ разинна йе ʼскурдиади фæрци, уæхæн Адæймаг. Æма ирон адæмæн уæхæн Адæймаг æй Къоста.
Нæ сомити сæр, нæ арфити сæр… Алли лæги бон нæ исуй уæхæн устур кадæ æма намуси аккаг исун. Æ адæми хуæздæр менеугутæ кæми баеу унцæ, æрдзæй уæхæн устур курдиадæ ка рахæссуй, æ цард æгасæй дæр адæми хъисмæти хæццæ арф ка бабæттуй, æрмæстдæр уæхæн адæмæй фæуунцæ дзиллæ сæрустур, æрмæстдæр етæ цæрунцæ сæ зæрдити æносмæ. Мах, Иристони адæм, Къостай ном фæззæгъæн сæрбæрзондæй, еци ном нин нæ зæрдитæ байдзаг кæнуй æнæкæрон сæрустурдзийнадæ æма уарзондзийнадæй.
«Къоста! Ирон адæми цæсгон, нæ дзилли æфсармæ æма туруса. Æнæкæрон хъазар æй алли ирон адæймагæн дæр. Адæм ин æнæкæрон хъазар ке адтæнцæ, сæ сæрбæлтау æ цард нивондæн ке æрхаста, талингæ догæй син рохс исонбонмæ нæдтæ ке лæгарста, уой туххæй», - загъта Къостай туххæй нæ курухун æма зундгонд финсгутæй еу – Дзасохти Музафер. Ма уомæй хуæздæр ма куд зæгъæн ес нæ ирон адæми нифс æма литератури арф къахгæ цæгиндзи туххæй.
Къоста цардæй тузмæг æма зин рæстæги. Уоци уавæрти æ цард æгасæйдæр æнгом исбаста адæми хъисмæти хæццæ. Йе ʼстур нифс, æ курухон зунд, йе ʼстур хъаурæ æнæвгъауæй лæвардта æфхуæрд дзиллитæн федæни рæсугъддæр æма амондгундæр царди сæраппонд. Æ «Ирон фæндур»-и фæззинд адтæй тæккæ устурдæр цаутæй еу нæ адæми истори æма культури. Ма кæд уæдæй нурмæ рацудйæ дзæвгарæ æнзтæ, фæззиндтæй ирон æвзагбæл берæ аллихузон уадзимистæ, уæддæр абони уæнгæ дæр «Ирон фæндур» изайуй ирон адæмæн тæккæ хъазардæр, уарзондæр, зæрдæмæ хæстæгдæр киунугæй. Къоста аци кинугæмæ ци уадзимистæ бахаста, уонæми равдиста хуæнхаг мæгур адæми царди æцæгадæ, адæми бæллецтæ æма сагъæстæ, хонхи æвадат æрдзи тузмæг нивтæ, исаразта дессаги цардæгас фæлгонцтæ. Æрмæст сæ еу хатт ка бакæса, уомæй некæдбал феронх уодзæнцæ мæгур адæми царди нивтæ: æфцæгæй коммæ уадæ куд фæдздзиназуй, ех донбæл æ хед куд исаразуй, лæги æмбæрцæ мет куд æруаруй… Æ гъостæбæл азæлдзæнцæ седзæргæс уоси гъарæнгæ, сæребарæуарзагæ æма цардбæллон Хъубадий зартæ, мæгур ихуæрсти, кусти фæллад ций, уой ка нæ зонуй, уоци æнæном еунæги сагъæстæ…
«Ирон фæндур»-и уадзимистæ фиццагидæр зæрдæ агайунцæ сæ адæмондзийнадæй. Алли рæнгъæ дæр, алли дзурд дæр си сæумон æртæхау æй рæсог, кæдзос. Ку сæ кæсай, уæд музыки зæлтау рæвдаунцæ адæймаги, æ зæрди ин игурун кæнунцæ цийнæ æма маст, уарзт æма æнæуинондзийнадæ, седунцæ хæлардзийнадæ æма тохмæ.
КАТАЙ
Мæ хæлар, мæ уарзон, æнæзонгæ уарзон!
Цы номæй дæм бадзурон, уый ма мын зæгъ?..
Мæ зæрдыл дæ дарын цы ныфсæй фæразон,
Мæ райгуырæн бæстæ, мæ фыдæлты зæхх?
Мæ райгуырæн бæстæ! Дæ айнæг къæдзæхæй,
Дæ фидар, фæлтæрд риуæй хъусын хъæрзын…
Мæ хæлар, мæ уарзон! Дæлзæххæй, уæлзæххæй,
Кæмдæриддæр дæ, — тагъд мæ хъæрмæ фæзын!..
Хъæр мæрдтæм дæр хьуысы, — куы бамбæхсай барæй,
Уæд усы кæрдæны мыггагмæ фæхæт!..
Мæ мæгуыр Ирыстон! Æрцæуæг æлдарæй,
Тыхгæнæг хæддзуйæ дæ ма уæд, ма, мæт?
Тыхгæнæг хæддзумæ кæд искуы фæндонæй,
Æууæнккагæй радтай, рæстæнхъæл, дæ бар?..
Мæ хæлар, мæ уарзон! Ныммæл мын фæсмонæй,
Ды искуы хæддзуйæ куы скæнай æлдар!..
Къостай исфæлдистади хецæн бунат ахæссунцæ сабитæн ци æмдзæвгитæ ниффинста, етæ. Къоста хъæбæр берæ уарзта сувæллæнттæ. Арæх, сувæллæнтти астæумæ бафтуйгæй, син аргъæуттæ дзурдта, кастæй син æмдзæвгитæ. Етæ дæр ибæл æновуд адтæнцæ, æ алфамбулай уайтагъддæр æртумбул уиуонцæ, ма имæ лæмбунæг игъустонцæ.
Ниффинста син еу инсæй æмдзæвгей бæрцæ. Бацæттæ сæ кодта мухури рауадзунмæ дæр. Æ кинугæ исхудта «Зæрватукк», æ бунмæ ба финст адтæй: «Мæ лæвар ирон сувæллæнттæн». Æрмæст уомæй дæр бæрæг адтæй æ цæстингас сабитæмæ. Гъулæггагæн, æ рæстæги къохфинст мухури рауадзун æ къохи нæ бафтудæй. Фал фæстæдæр берæ хæттити æрцудæй мухургонд. Æнæ дузæрдуггагæй зæгъæн ес, Къоста аци кинугæй цæрæнбонтæмæ ирон сувæллæнттæн цæстуарзон лæвар ке бакодта, уой.
Æмдзæвгитæ финст æнцæ аййев, рæсугъд æвзагæй. Сæ ритмикон арæзтмæ гæсгæ æнцæ æнцон гъудикæнæн. Сувæллонмæ игурун кæнунцæ рæсугъд æнкъарæнтæ, сагъæстæ, уарзондзийнадæ адæммæ, æрдзæмæ, цæрæгойтæмæ, ахурмæ, фæллойнæмæ. Уæхæн æмдзæвгитæ æнцæ: «Гино», «Кæмæн цы», «Уасæг», «Фыдуаг», «Лæгау», «Дзывылдар», «Уалдзæг», «Сæрд», «Фæззæг», «Зымæг» æма æндæртæ.
Устур аргъ кодта Къоста адæмон исфæлдистадæн æма æй зонгæ дæр хуарз кодта. Арæхстгинæй си пайда кодта. Уони мотивтæ æма сюжеттæмæ гæсгæ ниффинста дессаги уадзимистæ: «Лæскъдзæрæн», «Фсати», «Хетæг», «Уæлмæрдты» æма æндæртæ. Ниффинста ирон æмбесæндти бундорбæл цалдæр басни дæр: «Бирæгъ æмæ хърихъупп», «Марходарæг», «Саг æмæ уызын», «Рувас æмæ зæгъарæг», «Уайдзæф». Аци баснитæ дæр сувæллæнттæ хъæбæр цæмæдесæй фæккæсунцæ. Сауæнгæ ма сæбæл скъолатæ æма рæвдауæндæнтти инсценировкитæ дæр искæнунцæ.
Сувæллæнтти темæ Къостай исфæлдистади æрахæста устур бунат æрмæст финсуни æгъдауи нæ, фал ма хузæкæнуни дæр. Цалдæр нивеми равдиста сувæллæнтти мæгур, гъæуагæ цард. Сæ еу æй «Дурсæтджытæ». Рæсугъд æрдзи гъæбеси Къоста равдиста дууæ хуæнхаг биццеуи. Æнцæ мæгур, архайунцæ сæ минкъий уодтæй фæндаг аразгути хæццæ. Сæ уæле бузуртæ, сæ бауæр игон, фал уæддæр æнцæ цардбæллон.
Къоста ирон æвзаг æма литературæмæ бахаста æгæрон æвæрæн, æностæмæ дæр байзадæй сæ бундорæвæрæгæй. Æрмæст устур курдиади хецау нæй поэзи æма прози медæгæ, фал ма æй æгас ирон дзилли патриот. Æведуйгæ уарзтæй уарзта, ке æхсæн фæззиндтæй дуйнемæ, ке æхсæн исгъомбæл æй æма цардæй, уони. Къоста низзардта нæуæг хузи, никкастæй царди растдзийнадæмæ, равдиста ин æ катай æма æ сагъæстæ, равдиста сæ бæлвурд – бæрæгæй æгас дуйней дзиллæн. Хумæтæги æвæрд не ʹрцудæй дуйней берæнацион поэзий хуæздæр дзурди дæснити æмрæнгъæ.
Къостай исфæлдистадон фæндæгтæ æнцæ даргъ æма урух, æ берæвæрсуг поэзи нæ адæми зæрдитæмæ иссердта над æма си байахæста арф бунат. Æнæдузæрдугæй нæ бон зæгъун æй, нæ адæми культурæ, нæ адæми царди историй Хетæгкати Къоста æ æстæуккаг цæгиндзæ ке æй. Уомæй райдæдта нæ литературæ, нæ аййевадæ, æностæмæ ин æрæвардта федар бундор.
ЗОНЫН
Зонын, æфсæрмæй кæудзыстут,
Бавæрдзыстут мын мæ мард,
«Рухсаг у, рухсаг, — зæгьдзыстут,
Ницæмæн уал уыд дæ цард!»
Зонын, æргæвддзыстут исты, —
Мардыл ма чи дары ком? —
Алчи æфсæстæй мæ хисты
Ссардзæн арахъхъæй мæ ном.
Иу бон æгъгъæд у мысынæн,
Иу бон кæндзыстут мæ дзырд,
Уый фæстæ ферох уыдзынæн, —
Ничи уал зондзæн мæ цырт.
Еунæг аци гъуддагæй фæррæдудæй Къоста. Ирон адæмæй некæд уодзæй иронх æ ном. Æностæмæ ин кадæ æма намус.
ТÆХУДЫ…
Тæхудиаг, буц хъæбулæй
Йæ уалдзæджы царды хурæй
Чи бафсæст йæ мады хъæбысы!
Тæхуды, æрæгвæззæджы,
Хъæлдзæгæй æнкъард рæстæджы
Йæ рагуалдзæг хорзæн чи мысы!
Тæхуды, йæ фыды зæххыл,
Йæ уарзон æмгарты рæгъыл
Кæмæн хъуысы дардмæ йæ зарæг!
Тæхуды, йæ гутонимæ,
Хæрзифтонг бæхуæрдонимæ
Йæ бинонтæн чи у сæ дарæг!
Тæхуды, йæ дзыллæйы раз
Чи ракæны барджын ныхас,
Кæй фæрсынц, кæй равзарынц зондæй!
Тæхуды, йæ уарзондзинад,
Йæ хорз ном, йæ фыдæлты кад,
Чи уадзы уæлæуыл зæрондæй!.
БАБОЧИТИ Этери