Поэти юбилеййи кадæн конкурс
Дигорон поэзий бундорæвæрæг, дигорон æвзаги болæмæргъæ, наций ирд æстъалу Малити Георгий райгурдбæл аци анз исæнхæст æй 140 анзи. Поэт рацудæй царди уæззау фæндæгтæбæл. Æ зæгъуйнæгти къубулойнæн кæд кæронмæ райхæлуни фадат нæ фæцæй, 1937 анзи æй репрессий æнæхатир зелгæ цалх æ буни нилхъивта æма æ косунæй банцадæй йе 'хседгæ зæрдæ, уæддæр æ фæсте ци литературон æма поэтикон уадзимистæ ниууагъта, етæ Иристони адæмæн иссæнцæ хъазар хæзнатау æма сæ кæсунцæ устур зæрдиуагæй.
Адӕмон поэзий уодигъæдæ хъæбæр хатта ӕма ӕнкъар дта Малити Георги. Ӕмӕ ин йе фадуат равардта хуæнхаг лæги психологи, уой уоди ездондзийнадæ ӕма зӕрди кæдзосдзийнади романтикон уӕлвонг хуарӕнтӕй равдесун. Георги ӕ царди дӕр, ӕ поззий дӕр хумӕтӕг хуæнхаг лӕг адтæй ӕма ӕ адӕми зӕрдихатти еуӕй-еу рӕсугъд менеугутӕ ирдӕй равдиста ӕ зӕрдӕлваст лирики.

Георги дзурдта, адæми царди ахсгиаг ци адтæй, уæхæн гъуддæгтæбæл, хуарз зудта адæми зæрди æууæлтæ, арф син лæдæрдтæй сæ бæллецтæ, сæ сагъæстæ; хуарз арæхстæй уони æвдесунмæ; æ нихас адтæй рæсог æма бæлвурд, арæхстгинæй пайда кодта адæмон исфæлдистадæй; æ гъудитæ хæстæг адтæнцæ адæми зунди рахастмæ; ци цард æма цаутæ æвдиста, уонæмæ кастæй адæми цæстæнгасæй; аргъ син кодта адæмон гуманизм æма этики барæнтæй.
Æвдиста æ доги гъæуккаг цард, кастæй имæ æ дзамани кæсæнæй æма æвдиста, еци цардмæ хæстæгдæр ци ай йевадæ адтæй, уой поэтикон фæрæзтæй.
Геуæрги хумæтæг æвзалуй къæртт æ адæмæй райсидæ, æ бæрзонд курдиади фæрци æй, Цикорай фæрдугау, тæмæнтæ искалун кæнидæ æма æй уотемæй фæстæмæ æ дзиллæбæл исæмбæлун кæнидæ. Æ исфæлдистадæн æ тухæ уой медæги æй, æма федар æнцойнæ кæнунцæ царди æндон æма æнæфæккеугæ фæткæбæл – карз æнæфедаугæ тох Фарнæ æма Фудæнхи 'хсæн.
Æ цард æма исфæлдистадон бунтæбæл дзорун æмбæлуй æнæкæрон берæ. Уомæ гæсгæ ин æ ном алли анз дæр иссерунцæ Цæгат æма Хонсар Иристони адæм. Аразунцæ равдиститæ, конкурстæ скъолати, рæвдауæндæнтти, культури хæдзæрттæ ма кæсæндæнтти, театри æма уотæ идарддæр. Аци анз дæр бабæй фæстаг нæ байзадæй нæ республикæ. Алли райони дæр бæрæггонд æрцудæй æ райгурæн бон. Устур æмдзæвгæ кæсгути конкурс арæзт æрцудæй Дигорай дæр, кæцими архайдтонцæ скъолати ахурдзаутæ æгас республикæй дæр. Арæзт æрцудæй Цæгат Иристони регионалон фæсевæди æхсæнадон организаци «Патриотический клуб «Родина», æ сæрдар Хъарданти Тимур æма Дигори райони Историкон мемориалон Цæголти Георгий хæдзарæ-музеййи косгути хъæппæресæй.
Архайгути нимæдзæ уотæ берæ адтæй, ма дехгонд æрцудæнцæ фондз къуаребæл сæ карæмæ гæсгæ. Алке дæр си æхе хъæбæр бацæттæ кодта. Игъосун сæмæ адтæй зæрдæн æхцæуæн. Цæйбæрцæ æнкъарæнтæ æвдист æрцудæй сæ цæсгæмттæбæл. Ци дессаги аййев адтæй сæ каст, сæ дзурд. Алли архайæг дæр æ размæ ивардта нисан, куд хуæздæр банкъарун кæнон мæ дзурди гъæдæй уадзимиси хъаппæ игъосгутæн.
Уони æхсæнæй уæлахез дзаутæ рартасун æнцон гъуддаг кæми адтæй. Жюрий размæ æвæрд æрцудæй зингомау фарста. Фал, куд зонæн, уотемæй алли конкурси дæр фæууй хуæздæрæй хуæздæртæ. Уони æхсæн мах райони Дæргъæвси гъæуи астæуккаг скъолай 2 къласи ахурдзау Фидарати Богдан, кæци кастæй æмдзæвгæ «Мæ тикис», æма 10-аг къласи ахурдзау Байматати Фатимæ æмдзæвгæ «Цъифæ рæстæг»-и хæццæ. Бацæттæ кодта сæ ахургæнæг Течити Альбинæ Анатолиййи кизгæ. Сæ дууæ дæр райстонцæ 3-аг бунæттæ. Лæвæрд син æрцудæй Кади гæгъæдитæ æма майдантæ. Йе æй хъæ бæр хуарз бæрæггæнæн уойбæрцæ архайгути астæу. Нæ зæрдæ син зæгъуй идарддæр устурдæр уæлахезтæ.
Хъарданти Тимурæй ба Хуцау исарази уæд, ауæхæн конкурстæ арæх аразуй, устур гъомбæладон куст кæнуй ирæзгæ фæлтæри хæццæ, разæнгард сæ кæнуй сæ маддæлон æвзаг, сæ райгурæн бæстæ уарзунмæ æма син аргъ кæнунмæ. Йе æй устур хъаурæ æма гъæугæ гъуддаг. Фулдæр æнтæстдзийнæдтæ æфтуйæд æ къохти.
Бабочити Э.