Новости

Кастæй топпи цъухмæ

Некеʹй иронх, нециʹй иронхи

  Фидибæсти Устур тугъд... Фашистон тухгæнгутæ æнæнгъæлти æрбампурстонцæ нæ Райгурæн бæстæмæ. Зиндони арт иссугъдæй. Багъудæй устур лæгдзийнадæ равдесун тугъди будури, цæмæй багъæуай кодтайонцæ нæ райгурæн бæстæ, нæ адæми сæребарæ цифуддæр знагæй. Фæсевæд тугъди будурмæ ку рандæ ’нцæ, уæд гъæу цума фемирæй, æзмæлæг си нæбал адтæй, уоййау фестадæй. Арвæй цума устур дор æрхаудтæй, уой хузæн цæвддорау фестадæнцæ адæм.

   Тугъди ка адтæй, топпи цъухмæ ка кастæй, уазал  акъоппити ка бадтæй, карз тох ка кодта цард æма мæлæти астæу, уони æхсæн Ирæфи районæй дæр берæ сахъ фурттæ адтæй, кæцитæ æхсистæнцæ æфсади рæнгъити, æвдистонцæ устур лæгдзийнадæ, кади ном искодтонцæ æрмæст сæхецæн нæ, фал ма нæ адæмæн дæр.

     1941 - 1945 æнзти Райгурæн бæсти размæ йе ’хæс кади хæццæ ка бафиста, уонæй адтæй Дедегкати Мазай фурт Мæхæмæт дæр. Тугъдæн æ тæккæ райдайæни рандæй знаги нихмæ тохмæ. Уой размæ еу цалдæр анзи косгæ дæр бакодта - трактористæй Ирæфи райони механизацигонд гъæди хæдзаради, фæстæдæр си иссæй косгути комитетти сæргълæууæг, 1939 анзæй фæстæмæ ба – бригадир. Уордигæй рандæй тугъдмæ.

Æ тугъдон фæндæгтæ адтæнцæ даргъ æма зин. Фал сæбæл цудæй æдæрсгæй, федарæй. Æхе æвдиста бæгъатæр хæстонæй. Еудадзуг æ зæрдæбæл дардта æ тугъдон артбахуæрд æма æй æнхæст кодта, Райгурæн бæсти хъæболæн куд æмбæлуй, уотæ. Фал си еунæг минут дæр иронх нæ адтæнцæ, хæдзари ке ниууахта, еци уарзон бийнонтæ. Уомæн æвдесæн æнцæ æрмæстдæр тугъди будурæй ци финстæгутæ æрвиста æ бийнонтæмæ, етæ. 

Æ зæрдæ хъæбæр дардта танкон æфсадмæ бахаунбæл. Фал ин нæ рауадæй. Ист æрцудæй 134 æхсæн полкки 45 гвардион æхсæн дивизимæ. 1942 анзи сентябри мæйæй 1943 анзмæ знаг дæрæн кодта Ленингради бунмæ. Дууæ хатти æй исæргъавта знаги нæмуг. Фиццаг хатт фæццæф уогæй, 1943 анзи июли мæйæй сентябрьмæ хъан адтæй æфсади госпитали, фал куддæр æхебæл фæххуæст æй, уотæ раздахтæй йе ’фсадмæ. Берæ рæстæг нæ рацудæй, ма нæуæгæй фæццæф æй. Аци хатт знаги нæмуг æ кæнон бакодта. Дедегкай - фуртæн ракъуæрдтонцæ æ галеу усхъæй бунмæ æртиккаг хай. Ке зæгъун æй гъæуй, идарддæр æ бон нæбал адтæй фашистон лæгмарти дæрæн кæнун. Лæвæрд ин æрцудæй Фидибæсти тугъди фиццаг къæпхæни орден æма берæ майдантæ.

Æ хæдзарæмæ исæздæхгæй дæр, еунæг бон дæр бадгæ нæ кодта. Нæуæгæй бацудæй кустмæ гъæди хæдзарадæмæ. Кадгин, ездон лæгæй, æгъдаугин бийнонти фидæй æй зудтонцæ адæм. Аргъ ин кодтонцæ æ хуæрзуод æма кустуарзондзийнадæн йе мкосгутæ.

Фидибæсти тугъди рæстæги нæ райони цæргутæ ци скъухтдзийнæдтæ бавдистонцæ, етæ зундгонд æнцæ æгас дуйнебæл. Нæ ’нцæ иронх сæ байзайæггæгтæй æма сæ имисунцæ. Кадæ син кæнунцæ.

                              Бабочити Э.