Уæхæн сæргонд адтæй нæ райони сæйраг библиотеки ци дессаги медесгун бæрæгбон арæзт æрцудæй 6 ноябри, уомæн. Аци бæнтти Чикола æма Ирæфи райони цæрæг дзиллитæ бæрæг кодтонцæ æнæбæрцæ курдиатгун поэт, прозаик æма драмматург, мæгур адæми сæрбæл тохгæнæг æма демократ, гуманист æма рохситауаг Малити Георгий райгурæн бони 140 анзи.
Райони сæрмагонд библиотеки косгутæ сæхе хъæбæр зæрдæй разилдтонцæ аци гъуддагмæ æма бацæттæ кодтонцæ равдист, кæций рахастонцæ дзиллити размæ, цæмæй еумæ кадгин уавæри исцитгин кæнонцæ нæ национ поэзий ирддæр æстъалуй ном. Ма еци гъуддаг сæ къохи бафтудæй.
Алли адæмихатмæ дæр фæууй, æ суйни сæрбæл кæмæй фæххуæцуй, уæхæн мийнæвæрдтæ. Ном æма ин кадæ -цитæ етӕ искæнунцæ иннæ нацити æхсæн етæʹй исесунцæ уæлиаудæр культурон къæпхæнтæмæ, етæ фæуунцæ æ федар буцæутæ, æ астæуцæгиндзитæ. Еци хузи æркæсгæй, мах дæр, алайнаг адæм, æнæирисхъæ нæ разиндтан. Ес нæмæ Хетæгкати Къоста æма Малити Георги, æма нин е барæ дæттуй сæрустур унмæ иннæ адæмти астæу.
Амонгутæ Георгий царди хабæрттæбæл бæстон æрдзурдтонцæ. Йе `сфæлдистадон фæндæгтæбæл ин сæ цæстæ рахастонцæ: йе `мдзæвгитæ, поэмитæ, тæлмацтæбæл. Æмдзæвгитæ финсун æвзонг биццеуæй райдæдта, Мæхчески сколай ма ку ахур кодта, уæд, фал æ еци уадзимистæй мах уæнгæ неци æрхъæрдтæй, гъулæггагæн. Малити Георги, куд курухон поэт, уотæ поэзий цæттæ хуми нæ рауагъта æ ауæдзæ, фал алцидæр ахецæн кæнгæ рауадæй. Кæд дигорон æвзагбæл фиццагидæр аййевадон хузи Гурдзибети Блашка исдзурдта – курдиадгун финсæг æма бæгъатæр æфсæддон, уæддæр дигорон литературон æвзаги æма дигорон аййев литератури бундорæвæрæгбæл нимад цæуй Малити Георгий.

Ӕнггæтей разæй Малий-фуртæн бантæстæй дигорон æвзаги гъæздуг æма рæсугъддзийнадæ æнхæстæй бавдесун. Уомæн æвдесæн адтæй, аци равдисти Чиколай гъæуи скъолати ахурдзаутæ Георгий финст æмдзæвгитæ ку кастæнцæ, уæд ци дессаги рæсугъд æвзаг адтæй уонæн, йе. Раст болæмæргъи зарау зæлланггæнагæ, зæм-зæми донау рæсог. Аййев æма зæрдæмæдзæугæ, адæми зæрдæмæ арф куд багъардтайонцæ, уотæ бакастæнцæ æмдзæвгитæ: Чиколай 3-аг скъолай ахурдзау Бабочити Олег; Чиколай 1-аг скъолай ахурдзаутæ Малити Давид, Малити Фариза, Малити Александр, Дедегкати Алинæ, Цорионти Сослан; Чиколай 2-аг скъолай ахурдзаутæ Тауасити Давид, Тауасити Арина, Бесолти Виталий.
Георгий исфæлдистадæбæл дзоргæй, сæрмагондæй æнæ зæгъæн нæййес æ уадзимисти дессаги музыкалондзийнади туххæй. Малий-фурти æмдзæвгити поэзи æма музыкӕ кӕрӕдземӕ уотӕ бахӕстӕг унцӕ, ӕма се `хсæн ци арæн ес, е хатгай æнхæст бӕрӕг нӕбал фӕууй. Цалдæребæл си æрцудæй музыкæ æвæрд.
Малити Георги, разагъди поэт, æ исфæлдистади медæги архайдта ахердигонау исдзуапп кæнунбæл царди æносон фарстатæбæл. Устур поэтæн æ цæстæ фулдæр æма идарддæр фæууинуй е `мдогонтæй, æ зæрдæ арфдæр фенкъаруй æма хæстæгдæр фæййесуй æхемæ, æ йалфамбулай ци ӕййивддзийнæдтæ фæццӕуй, гъе уони.
Хуарзӕй берӕ нӕййес, фӕззӕгъунцӕ Дигорӕмӕ. Поэзи уӕхӕн дуйне ӕй, кӕцими и къинсӕй и гахæ уӕлдай хъазар дæр ӕй. Ӕма кӕд Георги уадзимистӕн сӕ нимӕдзӕ минкъий ӕй, уӕддӕр фагӕ разинддӕнцӕ сӕ исфӕлдесӕги ном ӕносон фӕккӕнунмӕ
«Къостай «Ирон Фӕндур» æма Георгий «Ирæф» бæзгин киунугутæ нæ `нцæ, фал нин нæ национ аййевадон литературæ исистонцæ тæккæ размæцуддæр адæмти культурон хæзнати уæнгæ. Исбæзтæнцæ нæ райгурæн Иристонæн цæруни æма ирæзуни нифсæн, ӕфсар ӕма лӕгдзийнадӕн!
Малити Георги, куд федог, уотæ æ уодæй фулдæр ци кæстæрти уарзта, етæ ин æ нистауæнтæ, æ фæдзæхститæ исæнхæст кодтонцæ. Тундзунцæ рохсмæ, æнцæ кæрæдзебæл баст, ес сæмæ нифс æма лæгдзийнадæ, æфсар æма æгъдау. Ӕнцæ раззæгти хæццæ ахури дæр, фæллойни дæр ӕма æфсæддон гъуддæгти дæр», - дзурдтонцæ амонгутæ. Ракодтонцæ Уæрæсей сæрмагонд æфсæддон операций Украини ка архайуй нæ районæй, еци фæсевæди кой дæр. Куд бæгъатæр æма æхсаргинæй сæхе æвдесунцæ тугъди будури. Нæ зæрдæ син зæгъуй, уæлахезæй æма сæрæгасæй куд исæздæхонцæ Иристонмæ, сæ бийнонтæмæ.
Малити Георгий дзурдтӕ ӕма Хекъилати Людмили музыкӕбæл æвæрд зар «Федог» разардта райони культури Галауани вокалон къуар. Хекъилати Людмилæ ма музыкæ ниффинста æмдзæвгæ «Æлхуйнæ»-мæ дæр, кæци разардта æхуæдæг.
Ӕностӕмӕ цӕрӕд Малити Георгий ном! Ӕ поэзи нин уӕд размӕхонӕг ӕма раст фӕндӕгтӕбӕл аразӕг, кӕрӕдзебӕл бӕттӕг ӕма уодтӕ кӕдзосгӕнӕг, зунд ӕма нифси хуасӕ, уарзондзийнадӕ фӕлдесӕг ӕма зӕрдитӕ фӕлмӕнгӕнӕг!
Федар ӕма уӕлахезӕ уӕд нӕ фиддӕлти рохс къӕсӕр –нæ Дигорӕ! Тӕхгӕмаргъӕн ӕнӕ дууӕ базуремӕй тӕхӕн ӕма цӕрӕн нӕййес, ӕма ӕностӕмӕ азӕлӕнтӕ нӕ еу адӕми дууӕ ӕвзаги - ирон ӕма дигорон! Цӕрӕд ӕма деденӕг калӕд нӕ уарзон, нӕ еунӕг Фидибӕстӕ - нӕ Иристон! Хетӕгкати Къостай «Ирон Фæндур» ӕма Малити Георгий «Ирӕф» нæ фӕндараст кӕнӕнтӕ нӕ исонибонмӕ, нӕ Федӕнмӕ! Аци равдисти ка адтæй, уонæй ба еунæг адæймаг дæр, мæнмæ гæсгæ, уæхæн нæ разиндзæй, æ зæрдæмæ Георгий исфæлдистадæ дуар кæмæн нæ байгон кодта ма си не ʹрбунат кодта.
Райони сæйраг библиотеки косгутæ зæрдæй арфæ кæнунцæ, алли равдист бацæттæ кæнуни сæ фарсмæ ци адæм æрбалæууй, сæ фарс сæмæ ка бадаруй, уонæн: Аркъаути Джульеттæн, Озити Тайæн, Увжихъоти Зæлинæн, Хекъилати Людмилæн æма райони культури Галауани косгутæн. Некæд сæхе бафæсвæд кодтонцæ. Алли равдист дæр исигъæлдзæг кæнунцæ адæми зæрдитæ, ма син Еунæг Устур Хуцау арфæ ракæнæд.
Мæн ба раарфæ кæнун фæндуй библиотеки косгутæн сæхецæн. Еунæг бæрæгбон дæр нæ уадзунцæ æнæргъудийæй. Дессаг медесгун, æрмæгæй гъæздуг равдиститæ бацæттæ кæнунцæ, кæцитими архайунцæ сувæллæнттæ, нæ ирæзгæ фæлтæр, нæ исони бони æнгъæлдзаутæ. Бæттунцæ сæ нæ культурæ æма традицитæбæл. Уарзун син кæнунцæ дигорон дзурд æма аййевадæ. Уæ хъаурæ берæ уæд. Арфиаг уæд уæ куст.
Бабочити Э.


