Дзорæн ресгæ фарстатæбæл

       

     Хестæр адæмæй беретæ гъуди кæнунцæ райони устурдæр гъæу æма ин æ центр дæр ке хонæн алкæддæр, уоми ци «автовокзал» фæууидæ, уой. Е арæзт æрцудæй дæсгай æма дæсгæй æнзти размæ адæми æнцондзийнадæн. Фæууидæ си къассæ, æхгæд павильон - хор, е уарунæй си хе багъæуай кæнуни туххæй, ескумæ цæугæй, кенæ балцийæй æрæздæхгæй. Конд адтæй паддзахадон зæнхи фæзуати, адтæй ибæл барадон оргæнтæй дзуапп дæтгутæ, куд æ санитарон уавæр уагбæл даруни, транспорт афонадæ æма æнæкъулумпитæй цæунæн, æма уотæ идарддæр гъуддæгутæбæл. Еу загъдæй æй зæгъдзæнæн уотæ æма - е адтæй советтон цардиуаги хуарз рахуæцæнтæй еу къаццеуагæ. Фал….

   Никкодта уæхæн рæстæгутæ, æхца, мулк æма уонæй не ΄фсæдундзийнадæ нæ царди фæрæзнæ ку иссæнцæ, не ΄фсар, нæ адæймагдзийнадæ, нæ рагфиддæлти хуæздæр æгъдæуттæ æма фæткитæ, уони кадгин ном хæссундзийнадæ нин уæлдæр ранимад гъуддæгутæ ку феронх кæнун кодтонцæ. Уæхæнттæмæ кæсгæй æма уони уингæй, адæймагмæ хатгай цæрун дæр нæбал фæццæуй.

   Цæмæн ракодтон мæ аци мæстгун дзубанди абони царди нихмæ? Уомæн ни алке бон дæр æй мингай æма мингай дæнцæгутæ æрхæссун, фал нур ба мæ дзубанди уæлдæр ци автовокзали кой ракодтон, уой абони уавæри туххæй æй. Æнæ уой фæууингæй уи, хъазар газеткæсгутæ, беретæ, æвæдзи, билæскъелæ дæр ракæндзæнæнцæ, «…цитæ имæ цæуй, цæбæл дзоруй? Нури хузæн хуарз ба кæд цардан? Ци дæ багъæуа æма ци не ΄ссердзæнæ, сауæнгæ дæнцæн ке хастан «цъеуи цихт», зæгъгæ, уой уæнгæ…»,- зæгъгæ. Фал, цæмæй мæ дзубанди æнæ бундор ма уа, уой туххæй «фæдес» нигъгъæр кæнун цæбæл æнгъезуй, еци уавæрæн исистон аци бæстихæйтти хузтæ дæр æма сæмæ æркæсетæ уæхуæдтæ. Азум ке кæнун, уонæн дæр фæууотæ тæрхонгæнæг.

Хатгай нæ цард кедæрти фуд кæнæн, ести незихатт бабæй исхуæцгæй, агорæн кæройнæгтæ. Фал нæ къæхтибуни ци антисанитарон уавæртæ исæвзуруй арæх, уони туххæй ба нæ дзорæн, кæрæдземæй дигорон æфсæрмитæ кæнгæй. Æндæр, берæ адæм уинунцæ ами ци тæссаг уавæр исæвзурдæй, уой, фал некæд неке бафарста «аци автовокзали хецау цума ка΄й, нæ гъаст кумæ бахæссæн?» Нæбал нæмæ ес паддзахадон уæхæн учрежденитæ, кæцимæ адæймаг æхе бахата, кумæ æ гъаст бахæсса, кæмæй байагора дзуапп гъæндзийнадæ раеуварс кæнуни гъуддаги.

   Гъæу гъæу æй. Ес алли гъæуæн дæр администраций сæргълæугутæ, нæ цардиуаги домæнтæ æнхæст æма хуæздæр кæнунмæ ци гъæууон администрацити минæвæрди æмбурдтити депутаттæ равзарæн, етæ. Фал… Аци цубур дзурдæй гъуддаг лæдæрд æй мæнæй уотæ.

«Аци автостанци уавæрбæл ка΄й дзуаппон?», - зæгъгæ, еци фарста равардтан Чиколай гъæуи администраций хецау Саккати Артурмæ. Æ кусти медæгæ имæ æнæмæнгæ дзуаппондзийнадæ ке ес, уой зонгæй мæмæ дессаг дæр фæккастæй, уавæр атæ «кæуйнагмæ» ке æрцудæй гъæуæн æ тæгкæ астæу, е.

   Артур нин куд радзурдта, уотемæй æгас вокзали фæзуат дæр æй хецæн адæмти къохти, кæцитæмæ ами ес тукæнттæ æма тæксити фирмæ. Зæнхи фæзуати хецæн хæйттæ еу къохæй иннемæ уæйæгонд фæццудæнцæ раздæр æнзти, фал си уæлдæр æрхаст антисанитарон уавæрбæл ба дзуаппон неке разиндтæй. Уотемæй ба, хатир корун, газеткæсæг, ци иуазæгдонæ си конд æрцудæй кæддæр, уоми къах ниввæрæн нæбал ес. Æнæбари имæ ци æрцæуæг адæм бацæуй, етæ нæбæл сæ «сæртæ хуайгæ» рацæунцæ, фуддæр ма ниууадзæ, уæхæн æнæкæрон цъумур уавæр си ке исæвзурдæй, уой туххæй. Тургъи къуммæ ласт цæуй бугъи голлæгутæ æма баркъитæ алли рауæнтæй, кæцити дзæгъæл хæтæг фонс ниппурхæ кæнунцæ, æмбурд сæбæл кæнуй биндзæ, се ΄смаг кæлуй идæрддæмæ. Мадта си ци æрдæгкондæй баизайæг дууæуæладзигон тукан ес, е ба дзæгъæл фонсæн иссæй гъонбадæн. Æнæгъæнæ æргъау си сæхе римæхсунцæ уаруни дæр æма хори дæр, æма си фонси цъумур хорхæй кæлуй.

   Артур ма нин радзурдта, æстæмæй - астмæ си, е уой ихæстæмæ нæ хаугæй, уотид æхе цæсгони æфсæрмæй, бугъæласгутæн ке раласун кæнуй исæвзурæг кæлæфхуæлци туппуртæ. Фал, ниххатир кæнтæ, кадæр си æхцатæ косдзæнæй, иннæ ба уой фалæмбулайтæ расæрфæ-басæрфæ кæндзæнæй?

   Уогæ ба нин, нæ хестæртæ, нæ рагфиддæлтæ, ахургонддзийнадæ дæр сæмæ нæ уогæй, ци берæ зундгин дзубандитæ ниууагътонцæ. Сæ еу уадзимисæй син æнгъизтæй мæ уацхъуди сæргонд искæнун дæр – «Æнгкæтей иуазæг хормæ байзадæй», - зæгъгæ. Гъома - еугурей иуазæг. Алке дæр æй æхемæ худта, æппунфæстаг ба иуазæг хормæ лæугæ байзадæй. Мах автовокзалæн дæр ес цалдæр хецауи, фал си еу дзуаппон ба нæййес. Базудтан син сæ хецæудти нæмттæ дæр, фал аци уацхъуди фæсте нæ зæрдæ дардзинан, ке сæмæ разиндзæнæй уойбæрцæ адæймагдзийнадæ æма нæ ке нæ багъæудзæнæй уони номхундæй ранимайун, уавæрæн ке иссердзæнæнцæ мадзал æнæмгъудæй.

Газетти косгутæ ба зонунцæ æрмæст гъæндзийнæдтæбæл нæ, фал арфи уацхъудтæ дæр финсун. Ес нæмæ советтон царди уагæй нин байззайæг «рубрикæ» «Газет финста. Ци конд æрцудæй?», зæгъгæ. Устур æхцæуæндзийнади хæццæ уацхъуд уайтагъд бакæсдзæнæнцæ нæ газетфинсгутæ хæстæгдæр номери. Хуарз æй мулк дæр, æхца дæр, фал ма царди ес берæ æндæр гъуддæгутæ дæр, сагъæс кæнун æма мадзæлдтæ ерун кæмæн гъæуй, уæхæнттæ, адæмти, нæ алливарс цæргути туххæй.

                                           Чихтисти Р.

Хузистити: фæдессаг уавæр Чиколай автобусти станци фæзуати.