Ахурадæ

   

Ахургæнæги Бони фæдбæл республики арæзт æрцудæй цитгингæнæн мадзал, кæцими республики Сæргълæууæг Сергей Меняйли бардзурдмæ гæсгæ Цæгат Иристони ахургæнгути устур къуар хуарзæнхæгонд æрцудæнцæ аллихузон паддзахадон хуæрзеугутæй. Хуæрзеугутæ лæвæрд æрцудæнцæ Цæгат Иристони театр «Саби» - й галауани. «Сумах уæ еугурдæр рæстуодæй æнхæст кæнетæ уæ ахсгиаг ихæстæ. Нæ дзиллæ уи арфиаг æнцæ уæ зин, фал кадгин хъазауатон фæллойни туххæй. Махæй алкедæр хуарз гъуди кæнуй æ ахургæнгути, уæлдайдæр ба æ фиццаг ахургæнæги. Етæ нæ нæ карни райдайæни аразтонцæ раст надбæл. Сæ зонундзийнæдтæ, сæ зæрди гъар æнæвгъауæй лæвар кодтонцæ махæн. Уæ куст æнцон нæй, ци агъазиаг арфити аккаг айтæ, уомæй, басæттун ибæл гъæуй, хаттæй - хатт æнхæст рæвдуд не ʹрцæуетæ, фал уой æгириддæр нæ нимайгæй, уæддæр уæ кустбæл устурзæрдæ нæ кæнетæ, æновуд ибæл айтæ, уæ еугур хъауритæй архайетæ, цæмæй уæ ахурдзаутæ аллихузон зонундзийнæдтæй ефтонггонд æма хуæрзæгъдау уонцæ, нæ бæсти исонибон нифсгунæй кæбæл баууæндæн, уæхæн фæлтæртæй куд ирæзонцæ, уобæл. Нуртæккæ арфæ кæнæн абони ка косуй, еци ахургæнгутæн еугуремæн дæр, удта нæ республики ахуради къабази еугур ветерантæн дæр. Мæ зæрдæ уин зæгъуй федар æнæнездзийнадæ, фарнæ æма нæуæг, никки агъазиаудæр профессионалон æнтæстдзийнæдтæ», - загъта æ арфи С. Меняйло.

     Æнтæстгин педагогон архайд æма профессионалондзийнади туххæй Республикæ Цæгат Иристон – Аланий æскъухт ахургæнæги ном кæмæн лæвæрд æрцудæй, уони астæу æнцæ Ирæфи райони минæвæрттæ дæр: Чиколай 3-аг астæуккаг скъолай географий ахургæнæг Бичегкути Риммæ æма Лескени астæуккаг скъолай райдайæн кълæсти ахургæнæг Цæмæхъати Верæ.

     Республикæ Цæгат Иристон – Аланий Кади гæгъæдийæй хуарзæнхæгонд æрцудæй Хæзнидони астæуккаг скъолай райдайæн кълæсти ахургæнæг Дзоблати Светлана. Æ арфæйаг кусти фæдбæл ахуради къабази Уæрæсей Федераций ахуради министради Кади гæгъæдийæй хуарзæнхæгонд æрцудæй Уæрæсей адæмон ахурадæ æма науки РЦИ – Аланий профсоюзти косгути организаций Ирæфи райони хаййади сæргълæууæг Бесолти Алан. Кади гæгъæдитæ ист æрцудæнцæ Тхости Мурати къохтæй.

     Ахургæнгути профессионалон бæрæгбони фæдбæл Кади гæгъæдитæ æма Арфи финстæгутæ зæрдиуаг арфити хæццæ лæвæрд æрцудæй Ирæфи райони бунæттон хеунаффæйади азгъунсти дæр къуар ахургæнæги æма рæвдауæндони косæгемæн дæр. «Ахургæнæги дæсниадæ æй кадгиндæрбæл нимад иннети æхсæн, уомæн æма æй зунддæттæг, гъомбæлгæнæг, раст надбæл аразæг. Сувæллони уоди царди медæгæ бауадзуй рохсдзийнадæ. Исуй ин дуккаг мади хузæн. Федарæй æй хезун кæнуй зонундзийнæдти бæрзæндтæмæ, архайуй, цæмæй æ алли ахурдзау дæр царди аккаг бунат иссера. Уой туххæй æ рæстæг æма æ хъауритæ не ʹвгъау кæнгæй, хъазауатонæй архайуй æ зонундзийнæдтæ ирæзгæ фæлтæрæн дæттунбæл.

Ахургæнгути профессионалон бæрæгбони фæдбæл уин зæрдиуагæй арфæ кæнун уæ уодуæлдай кусти фæдбæл. Берæ æнзти ма нин уотæ æнæнез, зæрдæрохс, нæ нифс æма нæ зунди мæсугтæ. Нæ сæртæй уин ниллæг ковæн, ан уи æнæкæрон боз», - загъта Ирæфи райони бунæттон хеунаффæйади сæргълæууæг Лагкути Омар, æма исæмбæлун кодта хуæрзеугутæ.

     Уæрæсей Федераций ахуради министради Арфи гæгъæдитæ сæ хъазауатон, уодуæлдай кусти фæдбæл ирæзгæ фæлтæри хæццæ, уонæн æнæвгъауæй зонундзийнæдтæ æма разамунд дæттуни туххæй хуарзæнхæгонд æрцудæнцæ Чиколай 2-аг астæуккаг скъола æма Чиколай 3-аг астæуккаг скъолай директорти хуæдæййевгутæ гъомбæлади фарстати фæдбæл Махъоти Валентинæ æма Цорити Ирмæ.

       Уæрæсей Федераций ахуради министради Кади гæгъæдитæ лæвæрд æрцудæй Советтони гъæуи астæуккаг скъолай музыки ахургæнæг Шрайман Жаннæн, Шекери астæуккаг скъолай географий ахургæнæг Перисати Ирæн æма Сурх - Дигори астæуккаг скъолай ирон æвзаг æма литератури ахургæнæг Габети Зæлинæн.

   Республикæ Цæгат Иристон – Аланий ахуради министради Кади гæгъæдитæ райстонцæ Шекери сувæллæнтти рæвдауæндони гъомбæлгæнæг Бетанти Мая, Хæзнидони сувæллæнтти рæвдауæндони гъомбæлгæнæг Будайти Ирмæ æма Хæзнидони астæуккаг скъолай математики ахургæнæг Бутати Светланæ.

     Республикæ Цæгат Иристон – Аланий ахуради министради Кади финстæгутæй хуарзæнхæгонд æрцудæнцæ райони уæлæмхасæн ахуради Центри педагог Гадати Людмилæ æма райони сувæллæнтти спортивон скъолай педагог – тренер Золойти Чермен.

   Нæ зæрдæ син зæгъуй æнæнездзийнадæ, профессионалон ирæзт, зæрдæрохс цард æма арфиаг ахурдзаутæ.

Бабочити Этери