Къостай райгурди 163 анзи бæрæгбони кадæн

 

   15-аг октябри Иристони цæргутæ устур цитгинæй исбæрæг кодтонцæ ирон национ литератури сæйрагдæр фæззинд, гениалон нивæгæнæг, поэт, драматург, публицист, прозаик Хетæгкати Къостай райгурди 163 анзей бон. Урух æмвæзади, аллихузон ахурдæндтæ æма рæвдауæндæндти, культурон артдзæститæ æма центрти, æхсæнадон æма фæлладуадзæн бунæдти æ кадæн арæзт æрцудæй равдиститæ æма концертон программитæ. Абони дæр ма Къостай æхседгæ дзурд æ зæрди уедæгтæ кæмæн агайуй æма ин е ’нæмæлгæ искурдиадæн устур кадæ ка кæнуй, етæ ба ин, cæ сæрæй ниллæг раковгæй, æ циртдзæвæнтæбæл ивардтонцæ деденгутæ.

Къоста - нæ æрдхуæрæни лæг, нæ сомити сæр, нæ намус æма нæ кади ахсгиагдæр рахуæцæн, æностæмæ нин кадæ искæнæг зæнхи уæлцъарæбæл цæрæг адæмихæттити астæу. Кæд æ цард хъæбæр тухст рæстæгути адтæй, уæддæр некæд ниууагъта æ зард æма æ æрвнæрæгау дзурд сæребарæ æма рæстдзийнади сæрбæлтау, æфхуæрд дзиллитæн нифси хуасæ уогæй. Тæгкæ устурдæр цаутæй ба æ царди медæгæ адтæй æ фиццаг киунугæ «Ирон фæндур», кæцими еци рæстæги ирон адæми цард бацудæй æнхæстæй. Алли дзурд дæр си æй хуæнхти бунæй райгурæг сауæдони æртæхау рæсог æма æрттевагæ, зæрди уедæгти арф хезæг.

   Къоста берæ уарзта сувæллæнттæ æма син ниффинста берæ æмдзæвгитæ, аргъæуттæ, æмбесæндтæ, уадзимистæ, кæцитæ сабийти зæрдæмæ хизтæнцæ арф æма сæ æфтудтонцæ рæсугъд æнкъарæнти, ахур дæр сæ кодтонцæ æнцон æма зæрддагонæй.

   18 октябри ба, куд берæ рауæнти, уотæ Ирæфи райони культури Галауани дæр Хетæгкай-фурти райгурæн бони 163 анзи кадæн арæзт æрцудæй ирон аййев дзурди хъаурæгинти еристæ. Архайæг си иссæнцæ райони гъæути культури артдзæстити гъомбæлгæнгутæ, скъолати ахурдзаутæ. Мадзалæн æ нисан æма ихæс адтæнцæ - Къостай ном бæрзонддæр исесун, ирæзгæ фæлтæртæн ирон литерæтури бундорæвæрæги искурдиадæ хуæздæр бавдесун æма сæмæ поэтмæ уарзт никки хъæбæрдæр исæвзурун кæнун. Конкурси архайгутæ дехгонд æрцудæнцæ дууæ къуаребæл сæ каритæмæ гæсгæ – 6 анземæй - 11 æма 12 анземæй - 16 анзей уæнгæ. Еристи пайдагонд цудæй Къостай исфæлдистади аллихузон темитæбæл æмдзæвгитæ æма сценкитæй.

   Мадзал райдайуни агъоммæ æ амонæг, Чиколай культури хаййади бæрнон косæг Хекъилати Людмилæ, конкурси архайгутæ æма залмæ æрбацæугути базонгæ кодта тæрхонгæнгути (жюрий) иуæнгти хæццæ. Етæ адтæнцæ: райони культури Галауани директор Кудзойти А.В., райони уæлæмхасæн ахуради Центри директор Дзансолти В.А., РЦИ - Аланий скъухт ахургæнæг Озити Т.Т. æма райони газет «Ирæф» - и сæрмагонд хаййади сæргълæууæг Чихтисти Р.А.

   Еристи архайгутæ, æдеугурæй 35 ахурдзауи, еу инней фæдбæл архайдтонцæ ирон æвзаг æма литератури бундорæвæрæги исфæлдистадæй адæми тæрхонмæ сæ уарзондæр æмдзæвгæ, уадзимис, е сценкæ рахæссун, Къостай гъæлæсиуагæй æй бакæсун, æ гъуди ин балæдæрун кæнун игъосгутæн, ериси сæрмагонд уавæртæ - интонаци, артистикон æма эммоционалон фæззелæнтæ, раст дзурди уагæй пайда кæнгæй.

   Жюрий иуæнгтæ аййев дзурди хъаурæгинтæн æвардтонцæ бæрæггæнæнтæ 1-æй 10-и уæнгæ. Еци фæдбæл сцени фарсбæл ба æвдист цудæй «слайд- шоу» - равдист Къостай цард æма искурдиадæбæл.

     Еристæ кæронмæ рахъæртгæй æма тæрхонгæнгутæ сæ бæрæггæнæнтæ бахинцгæй ба равзурстонцæ конкурси архайгутæн сæ хуæздæртæй хуæздæрти. Хестæр къуари конкурсанттæй фиццаг, дугкаг æма æртигкаг бунæттæ лæвæрд æрцудæнцæ Аркъаути Джульетти – Чиколай гъæуи культури Галауани сувæллæнтти театралон студи «Хори тунти» сæргълæууæги гъомбæлкæнуйнæгтæ Цорити Давид, Зехъети Аминæ æма Ганойти Данæн.

     Кæстæр къуари конкурсанттæй фиццаг, дугкаг æма æртигкаг бунæттæ байахæстонцæ Лескени, Секери, Сурх-Дигори культури Хæдзæрдти гъомбæлкæнуйнæгтæ Бетанти Валерия, Етдзати Мæдинæ æма Гацолати Валерæ, кæцитæн цитгин уавæри лæвæрд æрцудæй Кади грамотитæ æма зæрдæбæлдарæн лæвæрдтæ.

Кади грамотитæ ма райони уæлæмхасæн ахуради Центри директор Дзансолти Виталикки къохæй райстонцæ, еци бон кадæр иссæй архайæг еристи, еци сувæллæнттæ. Уæлдай арфæгонд æрцудæй Сурх – Дигори культури Хæдзари гъомбæлгæнæг Рæмонти Ирмæн, æхе финст æмдзæвгæ ке бакастæй бæрæгбони кадæн, уой туххæй, уæдта ма Чиколай культури Галауани Аркъаути Джульетти гъомбæлкæнуйнаг Цохъти Заур æма Зигойти Салимæтæн.  

   Фæцæнцæ еристæ, фал ма, ке зæгъун æй гъæуй, куд алкæд, уотæ, жюрий иуæнгтæ тæрхони бацæугæй куд исбæрæг кодтонцæ, уомæ гæсгæ сабийти разамонгутæ æма ахургæнгути гъæуй устурдæр æргом раздахун ирон дзурд раст дзорунмæ, конкурсант ци æрмæг дзоруй, уомæн æ гъуди лæдæрундзийнадæмæ, алли гъудиадæн дæр æ интонаци раст равзарунмæ, æма ма конкурси агъоммæ уонæмæ еума хатт æркæсун.

                                         Чихтисти Р.

Хузисти: Къостай игурæн бони кадæн райони культури Галауани аййев дзурди хъаурæгинти конкурси архайгутæ.