Силгоймæгти кадæн

       

Мадæ... Аци дзурдæй хъазардæр æма адгиндæр цъухæй не ´схаудтæй. Дуйней рохс ци сувæллон фæййинуй, уомæн дæр æ фиццаг исдзурд фæууй "мамæ". Е æрдзæй лæвæрд æй. Аци дзурдæй балæдæрун кæнуй ниййерæгæн, уарзондæр æма ин фæлмæндæр ке неке ес, уой.

     Ци дессаг æй æ зæрди конд мадæн. Ци берæ æнæхуссæг æхсæвтæ рарветуй æ бæдоли фæдбæл, авдæйнон ма ку фæууй, уæдæй æ кари бацæуни уæнгæ. Æй фæлмæн, бухсон зиндзийнæдтæн, хъаурæгин, хатиргæнагæ, сæрæн. Ма ци хуæздæр дзурдтæ ес зæнхи цъарæбæл, уонæй мади дессаг уоди кондбæл ци нæ бафедаудзæй.

       Мади зæрдæ - æнæкæрон будур. Мадтæлтæбæл сæ хуæздæр æмдзæвгитæ финсунцæ поэттæ, зарæггæнгутæ син исаккаг кæнунцæ сæ хуæздæр зартæ, хузæгæнгутæ син сæ дессаги аййев сорæт равдесунцæ гæгъæдибæл. Мадæй хъазардæр неке ес, уомæ гæсгæ маддæлти бæрæгбонмæ ци равдист бацæттæ кодтонцæ нæ райони Централон библиотеки косгутæ «Самая святая из женщин!», зæгъгæ, йе рауадæй медесгун, зæрдæмæгъаргæ, æрмæгæй гъæздуг. Иуазæгуати æрбахудтонцæ культури косгути, архайгутæн сæ маддæлтæ, сæ нанати. Бацæттæ кодтонцæ син литературон – музыкалон программæ.

     Маддæлтæн сæ бæрæгбони исаккаг кодтонцæ дессаги рæсугъд дзурдтæ. Амонгутæ Дадтети Салимæ æма Ганоти Данæ аййевдæр нæйес, уæхæн фæлгонц аразтонцæ æгас бæрæгбони дæргъи ниййерæг Мадæн. Силгоймаги дессаг уодиконд æма мади æнæзæнхон фæлмæндзийнадæбæл кастæнцæ æмдзæвгитæ Дзарасти Камилла, Гульчети Залинæ, Гуйти Вероникæ, Медойти Аминæ æма сувæллæнтти рæвдауæндонæ «Сказки» гъомбæлгæнуйнæгтæ. Дедегкати Алинæ ба бацæттæ кодта инсценировка Гурдзибети Блашкай «Авдæни зар» -мæ гæсгæ. Еци рæсугъд дзубандитæ æвзурун кодтонцæ æрцæуæг адæнмæ фæлмæн æнкъарæнтæ. Уомæй син сæ зæрдæбæл æрлæуун кодтонцæ, нæ ирон финсгути исфæлдистади ци дессаги мади сорæттæ æма фæлгонцтæ арæзт æрцудæй, уонæй цалдæр. Уæлдай арфдæр зæрдæмæ хизтæнцæ, мади тухæй ци таурæгътæ дзурдтонцæ, етæ. Алкæми дæр си æвæрд æрцудæй арф гъуди.

Мади æносон сорæт, силгоймаги уарзти æнæкæрон сауæдонæ, бийнонти астæу æ егъау бунат равдистонцæ сæ зарти Хæмицати Иветæ, Хабелати Альбинæ, Зангиати Аслан, Тускъати Розæ æма Плити Эдуард. Культури кафгути къуари разамонæги гъомбæл кæнуйнæгтæ Цорити Давид æма Тамати Ангелинæ ракафтонцæ ездон, националон, æнæкæрон æнкъарæнтæ æвдесæг «Хонгæ кафт». Бæрæгбонæн æ райдайæнæй æ кæронмæ фæйнæгбæл æвдист цудæй презентацитæ.             

   Æрмæст уати фæлгонц дæр адтæй тематикон æгъдауæй аййев. Фæрстæбæл зундгонд адæми курухон разæгъдтитæ мадæ ма силгоймаги тухæй. Æмбесæндтæ мади тухæй. Уобæл байархайдтонцæ культури Галауани косгутæ, кæцитæй арфиаг æнцæ равдист бацæттæгæнгутæ.    

     Зæрдæй арфæ кæнунцæ библиотеки косгутæ, сæ равдист цæмæй æнхæст рауадæйдæ, уомæй сæмæ материалон æгъдауæй сæ усхъæ ка бадардта, уонæн. Етæ æнцæ Дзагурти Ермак æма Дадтети Вадим. Сæ къох алкæддæр идзаг уæд, Хуцауи фарнæй хайгин уæнтæ. Уони фæрци конд æрцудæй равдистмæ хунд силгоймæгтæн фингитæ.      

     Равдисти кæрони Ирæфи райони культури управлений сæргълæууæг Зехъети Хетæг æма Гъуцъунати Батæрбег ракувтонцæ, ирон фингæ куд амонуй, уотæ æртæ къерей, ма раарфæ кодтонцæ фиццагидæр, нæ цард рæсугъд кæмæй æй, нивæ ма амонд ка хæссуй, еци силгоймæгтæн, маддæлтæн. Дессаги рæсугъд дзурдтæ иссердтонцæ етæ дæр сæ бабоц кæнунæн. Мади фæлмæн бахудт - бийнонтæн амонд хæссуй, æ уарзæгой зæрдæ ба - нифс æма хъаурæ. Æгас иуазгутæн дæр искодтонцæ устур аргъ, сæ зæрдитæмæ арф æнкъарæнтæ хаст æрцудæй, кæцити тухæй сæ гъудитæ загътонцæ кæронбæттæни. Дуккагидæр ба аци медесгун равдистбæл ка байархайдта, ка ʼй бацæттæ кодта, уонæн, райони сæйраг библиотеки косгутæн. Уой дæр ма мæ фæббæрæг кæнун фæндуй, æма аци кустуати кадæр косуй, етæ еумæйагæй бацæттæ кæнунцæ сувæллæнтти хæццæ алли бæрæгбонмæ дæр равдист. Йе уобæл дзорæг æй, æма кæнунцæ устур гъомбæладон куст.

   Еу загъдæй, иуазгутæ байзадæнцæ хъæбæр бозæй. Рæсугъд æнкъарæнти хæццæ си рандæй алке æ хæдзарæмæ.

                                                                       Бабочити Э.