Чиколай 170 анзей юбилеймæ

 

1941 анзи 22 июнь. Нуртӕкки нӕ доги фӕсевӕдӕн е рагон истори ӕй, фал хестӕр фӕлтӕрӕн ба ӕносон гъӕнӕ ӕма ристӕй сӕ зӕрдити байзадӕй. 1941 анзи ӕмбеси райдаедта, зӕнхӕбӕл ка некӕдма адтӕй, уӕхӕн тогкалӕн ӕгъатир тугъд.

Нӕ райгурӕн бӕсти еугур адӕнихӕттити ӕмрӕнгъӕ, тӕккӕ фиццаг бонтӕй фӕстӕмӕ, ӕрлӕудтӕнцӕ чиколайӕгтӕ дӕр, мӕлӕтдзаг тохи бацӕугӕй. Фидибӕстон Устур тугъди цидӕриддӕр рауӕнти цудӕй ӕзмӕлд, уоми еугуреми дӕр архайдтонцӕ: Украини, Белоруссий, Ленингради, Смоленски, Брянски, Сталингради ӕма ӕндӕр республикитӕ, горӕттӕ, гъӕутӕ байсунбӕл калдтонцӕ сӕ тог.

22 июни тугъдмæ фӕсседтӕнцӕ 1905-1918 ӕнзти игурд нӕлгоймаг фӕсевӕдмӕ. 23 июни ба Чиколайӕй ранӕхстӕр ӕй фиццаг тугъдонти къуар: Ӕлбегонти Ӕхсарӕ, Бабочити Хасанбий ӕма Омарбий, Баликъоти Мӕхӕмӕт, Рамазан, Алихан, Мӕхӕмӕт, Бесолти Мӕхӕмӕт, Магка, Темурхъан, Будтути Умӕти ӕма берӕ ӕндӕртӕ, ӕдеугурӕй 75 адӕймагемӕй фулдӕр.

Цӕргути фулдӕр хай сӕ сауӕнгӕ Чиколамӕ никкӕсӕни уӕнгӕ рафӕндараст кодтонцӕ (ӕнсувӕрон циртдзӕвӕн нуртӕккӕ кӕми ӕй, уой уӕнгӕ). Цӕмӕй зудтонцӕ уӕд чиколайӕгтӕ, 16 мӕйей фӕсте немуц ардӕмӕ дӕр ӕрбахъӕртдзӕнцӕ, уой.

Немуц фиццаг цӕф ци арӕнтӕбӕл никкодтонцӕ, еци арӕнтӕ багъӕуай кӕнунбӕл сӕхе бӕгъатӕрӕй равдистонцӕ чиколайӕгтӕ: Айдарти Данел, Ӕлбегонти Хъазбег, Батӕрти Тазе, Будтути Агубе, Гуӕцӕлти Мурат, Дзадзати Иса,

 

Хъаирти Рамазан, Кертанти Хушин, Хуасдзаути Замӕдин, Цӕрикъати Омарбий, Цорити Муса ӕма ӕндӕртӕ.

Нӕ райгурӕн бӕсти нигулӕн арӕнтӕ гъӕуайгӕнгӕй, Белоруссий цъимарати, Украини, Молдавий, Прибалтики республикити зӕнхити ӕносмӕ сӕ зинг рахустӕй чиколайӕгтӕ: Баликъоти Цуцу, Будтути Агубе, Гӕдзаонти Ибрагим, Гуӕздӕрти Мухарбег, Гамазти Муса ӕма берӕ ӕндӕртӕн.

1941 анзи уӕззау тохтӕ цудӕй Ленингради хонсар-нигулӕнвӕрсти, фал Советон ӕфсӕдтӕ нӕ фӕттастӕнцӕ. Цитгин Ленини горӕт багъӕуай кӕнунбӕл тохти архайдтонцӕ, сӕ цард нӕ бавгъау кӕнгӕй: Батӕрти Мустъафа, Гасанти Узер, Гулӕрти Батӕрбег, Дзанкисти Сулеман, Ельджарти Хасан, Хуасдзаути Морадин, Химилонти Хаджиморат, Цӕрикъати Агубекир, Цорити Дзанхот ӕма сӕ царди рохс ӕносмӕ кӕмӕн рахустӕй, еци тугъдонтӕ: Бетанти Харум, Темурти Иса, Хуадонти Тазе, Хуасдзаути Хъазбег ӕма иннетӕ.

Минкъийдӕр бӕгъатӕрдзийнадӕ нӕ равдистонцӕ чиколайӕгтӕ Сталингради бунмӕ тугьдтити дӕр. Ами бӕгъатӕрӕй сӕхе равдистонцӕ: Батӕрти Дзар, Будтути Тамбий, Гасанти Мӕхӕмӕт, Гуйти Муса, Кертанти Тазӕрет, Лагкути Цӕрай, Мӕрзойти Осмӕн, Цорити Мухарбег ӕма иннетӕ. Гергити Мӕхӕмӕт, Гуӕцӕлти Солтан ӕма Дауит, Дзадзати Хусин, Дзансолти Геуӕрги ӕма иннетӕн ба сӕ зинг ӕносмӕ бахустӕй Сталингради бунмӕ тохти.

Фӕстегӕй нӕ байзадӕнцӕ чиколайаг тугъдонтӕ Курски къӕлӕт, Харьков, Орел ӕма иннæ горӕттӕ гъӕуайгӕнгӕй дӕр. Кӕмидӕриддӕр адтӕнцӕ, уоми ӕгадӕ ӕма тӕпподдзийнадӕ сӕ сӕрмӕ некӕми ӕрхастонцӕ. Уомӕ гӕсгӕ си сæрустур куд нӕ уонцӕ абони Чиколай кӕстӕр фӕлтӕр.

1941 анзи Ирӕфи райони тӕккӕ фиццагдӕр тугъдмӕ рандӕ'й чиколайаг кизгӕ Будтути Тамарӕ. Уӕдмӕ Тамарӕ каст фӕцӕй Чиколай астӕуккаг скъолай авд къласи Кади гӕгъӕдий хӕццӕ ӕма ӕ ахур раидарддӕр кодта Грознай медицинон техникуми. Ӕртӕ анзи уайтӕгкӕ дӕр ратахтӕнцӕ ӕ сӕрти. Тамари косунмӕ рарвистонцӕ Ӕхсӕуӕмӕ. Ами косгӕй ӕй ӕрӕййафта Фидибӕстон Устур тугъд дӕр. «Мæ бон нæ‘й хӕдзари бадун, сӕдӕгай, мингай тугъдонтӕ тохи будури сӕ тог ку калунцӕ, еци рӕстӕг...» - финста ӕригон кизгӕ ӕ мадӕмӕ.

Ӕ райгурӕн хуӕнхбӕстӕн ци ард равардта, уой кади хæццӕ ӕнхӕст дӕр искодта.

1943 анзи феврали цубур артиллерион цӕтти фӕсте Цæгат-Кавкази ӕфсӕдтон хӕйттӕ ӕма еугӕндтӕ райдӕдтонцӕ размӕ ӕмпурст. Краснодар знаги дзӕмбутӕй исуӕгъдæ кӕнунбӕл тохти рӕстӕг, ӕ командири мӕлӕтдзаг цӕфæй ервӕзунгӕнгӕй, Тамарӕбӕл исӕнбалдӕй знаги нӕмуг. Уӕдмӕ Будтути Тамарӕ иссӕй медицинон служби капитан. Фӕстаг хатт ма ӕ хӕдзарӕмӕ ци финстӕг ниффинста, е æмбӕлгӕ дӕр нӕма искодта бийнонтӕбӕл, уотемӕй ӕ цард раскъудӕй ӕригон кизгӕн. Адӕн ибӕл искодтонцӕ кади зар.

Тӕккӕ минкъийдӕр Фидибӕстон Устур тугъдмӕ Чиколайӕй ранӕхстӕр ӕй сӕдӕгай тугъдонемӕй фулдӕр. Берӕ цардбӕллон фӕсевӕдӕн си сӕ зинг ӕностӕмӕ бахустæй тугъди будури, беретӕ ба си сахъаттӕй исӕздахтӕнцӕ сæ райгурӕн бӕстӕмӕ ӕма идарддӕр архайдтонцӕ адӕнон хӕдзарадӕ фӕстӕмӕ ӕ къӕхтӕбӕл ислӕуун кӕнунбӕл. Берети реутӕбӕл си фӕстугъд тӕмӕнтӕ калдтонцӕ аллихузон хуӕрзеугутӕ. Махъоти Амурхани фурт Алихан ба райста Советон Цӕдеси Бӕгъатӕри кадгин ном.

Журнал «Ирæф»-и 2022-аг анзи 4-маг номерæй.