Алли æригон адæймаг дæр, рæстæг ку æрхъæртуй, уæд æ амонди фæдбæл бакъахдзæф кæнуй æнæзонгæ бийнонтæмæ, кæцитæмæ фæууй сæхе уагæвæрдтитæ, сæхе æгъдæуттæ. Абони мæ зæгъун фæндуй уæхæн бийнонти туххæй æма, киндзæ хæдзарæмæ фарни къах æрбайвæргæй, йе ʹфсийни хæццæ æмзунд кæми иссæнцæ, кæрæдзей кæми балæдæрдтæнцæ. Еске хæдзари йе ʹгъдау, æ уодиконд æма лæгигъæдтæмæ гæсгæ æхе ка бауарзун кодта. Æма æрмæст хæдзари медæгæ бийнонтæн нæ, фал æ рæсугъд зæрди дуæрттæ æнæвгъау байгом кодта æгас хæстæгутæ, хеуæнттæн дæр.

     Абони ба нӕ редакцимӕ ӕрбацудӕй курдиадӕ уомæн æ æфсийни мадæй, æ кари ка бацудæй, уæхæн хъиамæтгун силгоймаг, толдзгуйнаг Гобети Любæй, цæмæй ин нæ газетти фæрстæй фегъосун кæнæн æ устур арфæдзийнадæ æ бæдоли бæдоли бийнойнаг Хъарати Дианæй. Ортабайти хæдзарæмæ фарни къах æрбайвæргæй, аци ӕригон адӕймаг ӕрмӕст йе ʹфсийнӕ Нини хӕццӕ нӕ, фал уарзӕгой зӕрдихатт равдиста Любæмæ дӕр. «Дианæ ӕ рæсугъд зæрди дуæрттæ æнæвгъау байгом кодта æгас муггагæн дæр æма синхбæстæн дæр. Фал мæнæн ба иссæй мæ кизги хузæн.

Ӕ фæлмæн цъухи дзурд æма рæвдаугæ ракастæй дæр хор бакæсун кæнуй адæймаги зæрдæмæ. Амондгун хонун мæхе мæ зæруай, уæхæн рæсугъд уоди хецæу ке æркувта мæ кизги хæдзарæмæ. Дианæ æй мадæ æма фиди æфсармæй хайгин. Æ нийергутæ Хъарати Александр æма Розæ æй исгъомбæл кодтонцæ æцæг ирон – дигорон æгъдæуттæбæл. Адæймагмæ цидæр хуарз менеугутæ ес, уонæй ин хайгонд æрцудæй царди медæгæ. Хуцау исарази уæд Александр æма Розæй, уæхæн кæстæр ка æривардта царди фæндагбæл. Рæстæгæй - рæстæгмæ фæуун мæ кизгæ Нинæмæ Хæзнидони, æма мæнмæ йе куд лæмбунæг æй, уотæ хе бæдолæ дæр нæ фæууй. Мæ алли гъуддаг дæр уайтагъд конд æрцæуй. Мадта ӕ алли февнӕлд дӕр куд рӕуӕг ӕма арӕхстгин ӕй. Æ цæстингас алкæддæр æй ирд, лæкъун æрфугæй некæд ракастæй, зуст дзурд некæд искодта. Дианæ æй дæнцæн хæссуйнаг. Ӕцӕг дигорон адӕймаг, силгоймаги кадӕ бӕрзондгӕнӕг.

Ци бон æркувта Ортабайтæмæ, уæдæй фæстæмæ йе ΄ригон уод уайтагъд хæдзарвæндаги хæццæ иссердта еу æвзаг, æ ездон тог æма берæ лæгигъæдти фæрци бауарзун кодта æхе. Ма си æ фиццаг бонæй аци бони уæнгæ æз куд арази дан, уотæ си еунæг Хуцау исарази уæд. Æ зæрди хуарздзийнадæй цидæр ес, етæ æ къохи бафтуйæнтæ. Æ ездон тог, йе фсармæ макæд фесафæнтæ. Дæ сæдæ анзей сæрти рæсугъдæй, æнæнезæй, рохс зæрдæй ракæсæ, Дианæ. Дæ цард дæ уарзон бийнонтæ, ка дæ нимайуй, уони хæццæ цийнаг уæд алкæддæр, мæ хор», - зæгъуй Любæ.

                                                                             Бабочити Э.