Зӕнхкосӕгӕн зонуйнаг

               

     Раевгъудӕй бабӕй еума радон кустадон анз гъӕууон хӕдзаради. Адӕм банимадтонцӕ зӕнхи ӕма фонси,  фӕлхасадон продукци уадзуни ӕма ма ӕндӕр уӕхӕн кустити медӕгӕ сӕ хӕрзтӕ, се ʾфтуйӕггӕгтӕ. Ӕма бабӕй ӕнӕмӕнгӕ бастауйнаг ӕй, зӕнхкосӕг анзӕндӕргъци ци хъиамӕт никкӕнуй баконд культуртӕй куд фулдӕр, уотӕ тиллӕгӕрзад райсунбӕл, е. Дзӕгъӕлти гъӕууонхӕдзаради аци къабази куст тӕгкӕ зиндӕрбӕл нимад нӕ цӕуй незамантӕй ардӕмӕ дӕр. Гъе, фал, гъулӕггагӕн, а фӕстаг ӕнзти медӕгӕ берӕ зӕнхи кусткӕнгутӕй иронх кӕнун райдӕдта, ци зӕнхӕбӕл цӕрӕн, кӕмӕй сойнӕ есӕн ӕма нӕ цард, нӕ дарӕг ке хонӕн, уой мадау уарзун дӕр ке гъӕуй, сувӕллонау имӕ – зелун, ӕма ин ӕ ау уотемӕй гъӕздугдӕр кӕнун.

    Ахургӕндтӕ раги куд исбӕлвурд кодтонцӕ, уотемӕй зӕнхи хуӕрзгъӕдӕдзийнадӕ нӕ царди медӕгӕ ӕй алцӕмӕйдӕр хъазардӕр. Уоми, зайӕгоййи дӕр ӕма цӕрӕгоййи дӕр цӕрунӕн цидӕр ахсгиаг бауӕргъӕдтӕ гъӕуй, етӕ ес. Уонӕй ку ӕрмӕгур уй зӕнхӕ, адӕймаг си ӕрмӕстдӕр есгӕ ку кӕна, хӕсгӕ ба имӕ ку неци кӕна, уой фудӕй, уӕд исуодзӕнӕй тӕссаг уомӕй, тагъд рӕстӕги ибӕл цӕрун дӕр хъӕбӕр зин ку исуа. Гъе, уомӕ гӕсгӕ,  зӕнхи хуӕрзгъӕдӕдзийнадӕ еудадзуг цӕуй бӕрӕггонд сӕрмагонд паддзахадон цӕстӕдарӕг оргӕнтӕй. Уӕхӕн ахсгиаг кустуат махмӕ дӕр ӕй Цӕгат – Кавказаг регионти ӕхсӕнадон управлени «Россельхознадзор», кӕци, Уӕрӕсей  Федераций уагӕвӕрдтӕ куд домунцӕ, уомӕ гӕсгӕ бӕрӕг дӕр, уӕдта амонгӕ дӕр кӕнуй, циуавӕр мадзӕлдтӕ аразгӕй зӕнхи гъӕздугдзийнадӕ фулдӕр кӕнунӕн, уони.  Аци кустуат, куд агъаззаг паддзахадон, уотӕ, зӕнхӕй пайдагӕнӕг гъӕууонхӕдзарадон кустуӕдти размӕ ивӕруй цӕхгӕр домӕнтӕ УФ Зӕнхон кодекси 13 ӕма 42 статьяти. Ивӕруй сӕрмагонд ихӕстӕ дӕр, гъӕууонхӕдзарадон зӕнхити фӕзуӕттӕй ци хецӕн адӕймӕгутӕ пайда кӕнуй, уони размӕ дӕр.

 Уомӕй фӕстӕмӕ ма, зӕнхӕн ӕхе, уӕдта ин ӕ гъӕздугдзийнадӕ багъӕуай кӕнуни уагӕвӕрдтӕ ӕмбурдгонд ӕнцӕ УФ 8-аг Федералон уагӕвӕрди - № 101 ФЗ «О государственном регулировании обеспечения плодородия земель сельскохозяйственного назначения», зӕгъгӕ, 16 июль - ӕй 1998 анзӕй.

  Еци статьятӕ куд зӕгъунцæ, уомӕ гӕсгӕ зӕнхӕй кадӕр пайда кӕнуй, паддзахадон уа, е хе хӕдзарадӕ, хецӕн адӕймӕгутӕ, е арендон зӕнхити косгутӕ, уонӕбӕл ес ихӕс зӕнхӕй уотӕ пайда кӕнун, ци культурӕ си ирӕзун кӕнуй, е ин зӕран куд нӕ хӕсса ӕ хуӕрзгъӕдӕдзийнадӕ ихалунӕн, фал ин пайда куд уа ӕ гъӕздугдзийнадӕ фулдӕр кӕнунӕн.

   Е ба ӕнтӕсдзӕнӕй уӕд, алли зӕнхӕй пайдагӕнӕг дӕр, уӕддӕр, ӕртӕ анземӕ еу хатт ку еса ӕ зӕнхӕй агрохимикон ӕма экологон токсикологон анализ – ӕркастдзийнадӕ, ци бауӕргъӕдтӕ си нӕ фагӕ кӕнуй, уони имӕ рӕдауӕй бахӕссунмӕ. Минкъий пайда ин нӕ ратдзӕнӕй еци бакуст ӕ баконд культурти тиллӕгӕрзӕдтӕ исбӕрзонд кӕнунӕн, уӕззау зӕранхӕссӕг металлтӕ ӕма ӕй токсикологон бауӕргъӕдтӕй багъӕуай кӕнунӕн, ӕма си ӕ хӕрзтӕй дзӕвгарӕ фулдӕр ӕфтуйӕггӕгтӕ райсунӕн. Мӕнӕй уотӕ, аци радзубандийӕй хатдзӕгтӕ искӕнун ӕнгъезуй нӕ райони зӕнхи кустгӕнӕг еугур хузи хӕдзарӕдти сӕргълӕугутӕн дӕр.                     

                                                                        Махъоти О.

Ирӕфи райони ГКУ «Управление сельского хозяйства» -и сӕйраг специалист.

                                                            Ӕрмӕг мухурмӕ бацӕттӕ кодта

                                                      Чихтисти Р.