Абони неке бон ӕй зӕгъун, курдони дӕсниадӕ кӕд фӕззиндтӕй, уой. Фал ибӕл дузӕрдуг кӕнӕн дӕр нӕййес, дӕсниадитӕн сӕ тӕккӕ рагондӕртӕй еу ке ӕй, уобӕл. Курдони куст недзамантӕй абони уӕнгӕ дӕр нимад цудӕй, цидӕр уӕларвон тухӕ ӕма хъаурӕ кӕми ӕвӕрд ес, уӕхӕн Хуцауӕй лӕвæрдбӕл, уомӕн ӕма адӕймаг ӕ коммӕ бакӕсун кӕнуй арт ӕма ӕфсӕйнаг. Славайнӕгтӕмӕ адтӕй курдон - Перун, бердзентӕмӕ - Гефест. Уомӕн ӕ бон адтӕй ӕ курдиади фӕрци Зевсӕн цӕхӕркалгӕ арвӕрттивдтитӕй фӕттӕ аразун.

Дигорон ӕма ирон адӕмон исфӕлдистади дӕр ес изӕдти ӕхсӕн курдони бардӕуагӕ - Курдалӕгон. Курдони кусти е нимад цӕуй тӕккӕ арӕхстгиндӕрбӕл. Курдалӕгони къохӕй конд дзаумӕуттӕ ӕма тохӕнгӕрзтӕй ефтонггонд адтӕнцӕ Нарти адӕн. Сауӕнгӕ ма син дзубури фийтӕ дӕр ниффесаридӕ хумӕ кӕнунмӕ. Айдагъ нарти адӕн нӕ, фал нӕ рагфиддӕлтӕмӕ дӕр хъӕбӕр устур цӕстивӕрди адтӕй еци изӕд. Ци ’й фӕндуй цийни бадти дӕр Курдалӕгони ном ӕнӕ иссергӕ нӕ фӕууиуонцӕ дигорон-ирон адӕн сӕ кувдтити, тарстӕнцӕ ин ӕ фудӕнхӕй. Мадта гъӕуи цӕргути ӕхсӕн уӕлдай нимаддӕр адтӕнцӕ алкӕддӕр курдонтӕ, уӕдта син алкӕддӕр уӕлдай кадӕ кодтонцӕ.

Зӕгъӕн, алли бӕрӕгбони дӕр син ӕнӕ ести лӕвар, кенӕ хунӕ ӕрбахӕсгӕ нӕ фӕууиуонцӕ. Уотӕ зиани фингӕй дӕр. Курдонтӕ сӕхуӕдтӕ ба алли анз дӕр сӕ изӕди ном ӕнӕ иссергӕ некӕд адтӕнцӕ. Ӕ номбӕл ин алкӕддӕр кодтонцӕ косарт.

Нуртӕкки доги курдони дӕсниади сӕр уотӕ ахсгиаг нӕбал ӕй, нимайунцӕ ’й евгъуд дзаманти хабарбӕл, рагон царди фӕззиндбӕл ӕма сабургай евгъуйгӕ фӕццӕуй исто- римӕ.

Нуриккон царди ӕ сӕр уойбӕрцӕбӕл нӕбал гъӕуй, уомӕн ӕма фӕззиндтӕнцӕ нӕуӕг хузи технологитӕ. Нуртӕккӕ ма ефстӕгтӕ зонунцӕ, дамаскаг ӕндонӕй дзаумӕуттӕ ӕма тохӕнгӕрзтӕ ка аразта, еци технологити бундорӕвӕргутӕ ка адтӕнцӕ, уой.

Фал уӕддӕр ӕ бундор ба ӕнцойнӕ кӕнуй къохти архайдбӕл, дзӕбокӕ ӕма хъӕстаргъбӕл.

Раздӕр рӕстӕгути курдон нимад цудӕй кустадон архайди еу хайбӕл, хӕдзарӕн мийгӕнӕнтӕ аразун уой усхъитӕбӕл ӕнцойнӕ кодта, мадта гъӕууон хӕдзарадон кустити дӕр ӕнӕ уой ӕнхусӕй равналӕн нецӕмӕ адтӕй, уӕдта тохӕнгӕрзтӕ ӕма ӕндӕр уӕхӕн дзаумӕуттӕ аразун дӕр уомӕ хаудтӕй. Нуртӕккӕ ба курдони куститӕ иссӕнцӕ, куд аййевадон фӕрӕзнӕ, уотӕ. Нуртӕкки доги курдонти сӕйраг куст ӕй хӕдзӕртти ӕндаг бакаст аййев кӕнун, горентӕ, рӕсугъд нивӕфтудтити хӕццӕ колдуӕрттӕ, асинтти хуӕ- цӕнтӕ ӕма ӕндӕр ести уӕхӕн куститӕ кӕнун.

Иристони дзӕвгарӕ адтӕй, курдон уогӕй, ӕ куститӕй зундгонд ка адтӕй уӕхӕнттӕ, фал нури доги ба сӕ нӕмттӕ иронхуати байзадӕнцӕ. Курдони куст уӕззау ӕма зингуст æй. Ӕстӕнтӕй уӕлдай некебал ӕрдумдзӕй кунцӕ, уӕдта дзӕбокӕй ӕфсӕйнаг хъӕстаргъбӕл некебал ӕрхуайдзӕй. Нӕ амондӕн ма нӕмӕ нӕ республики ес, ӕ къох абони дӕр еци дӕсниадӕбӕл ка нӕма исиста, уӕхӕнттӕ. Гъулӕггагӕн, етӕ ӕнцӕ еугӕйттӕ, къохи ӕнгул- дзитӕбӕл сӕ ранимайун ӕнгъезуй. Уонӕй ба еу ӕй Цорити Марклен. Ӕ курдиадӕ ӕма хевӕрцондзийнадӕн нерӕнги аргъгонд кӕмӕн нӕма ӕрцудӕй, уӕхӕн адӕймаги туххӕн зин финсӕн ӕй.

Цӕмӕй, нуртӕккӕ ци дӕсниадӕбӕл хуӕст ӕй, уомӕ ӕрцудайдӕ, уой туххӕн ӕй багъудӕй дзӕвгарӕ ӕнзтӕ. Зонгӕ дӕр ин нӕма кодта ӕ фӕстеугутӕ, гъома, ӕхецӕй арази ун ин тухтӕ ке дӕтдзӕнӕй еци дӕсниадӕбӕл ниллӕуди, уой, уотемӕй ӕй равзурста ӕхецӕн. Астӕуккаг скъола каст фӕууни фӕсте ӕхе ӕвзурста спорти. Раздӕр аразта нӕхемӕ, уӕдта сауӕнгӕ Европи дӕр спортзалтӕ, фӕстӕдӕр ба исахур кодта массажистбӕл ӕма 7 анзи бакуста Мӕскуй поликлиникитӕй еуеми. Мӕскуй ӕ зӕрдӕмӕ фӕццудӕй парусгин бӕлӕгътӕбӕл еристи архайун. Ци бӕлӕгъбӕл ленк кодтонцӕ, уой ӕхуӕдӕг искодта е 'нбӕлтти хӕццӕ ӕма ма сауӕнгӕ Онеги цади дӕр архайдтонцӕ еристи.

Фал, ӕхуӕдӕг куд зӕгъуй, уомӕ гӕсгӕ, денгиз Марклени зӕрди нӕ ниффедар ӕй. Ӕма уӕд ӕ цори фарста цӕхгӕр ӕрлӕудтӕй: «бӕлӕгъ ӕви курдбадзӕ». Марклен равзурста фӕстаг дӕсниадӕ ӕма нӕ фӕррӕдудӕй.

Ӕ нивӕн, базонгӕ ӕй зундгонд мӕскуйаг курд Павел Стасенкови хӕццӕ. Ӕ курдбадзӕмӕ ин ку бацудӕй, уӕд ӕй хъӕбӕр бафӕндадтӕй ӕхе еци дӕсниади бафӕлварун. «Ӕз ахурдзау н’ адтӕн, фал мин баихӕс кодта мӕтӕг деденгутӕ

исаразун. Райсӕ дзӕбокӕ ӕма курдонтӕмӕ цо».

«Куд фӕстӕмӕ, мӕ архайд рӕстмӕ кӕнун райдӕдта. Ӕвӕдзи, мӕ бӕллец ӕгӕр тухгин адтӕй, хъӕбӕр мӕ фӕндӕ адтӕй мӕхе къохтӕй ести исаразун, уодӕгас бауӕри хӕццӕ ке нӕ архайун, фал ӕфсӕйнаг ке исцӕрдхуз кӕнуни зӕрди дӕн, еци тухӕ мӕбӕл уӕлахез кодта, кенӕ мӕ сабийбонти хузтӕ кӕнун ӕма лӕхудзӕй еститӕ аразуни догӕ нӕуӕгӕй ӕригъал ӕй мӕ зӕрди, фал мӕ куст фӕррӕстмӕ ’й.

Кенӕ ба кӕд нӕ зундгонд дигорон скульптортӕ Тауасити Сослӕнбег, ӕнсувӕртӕ Руслан ӕма Вячеслави тогæй мӕмӕ ке хъӕртуй, е ми цидӕр фунӕй скурдиади зинг райгъал кодта». (Ӕ мадӕ Тауасити кизгӕ ӕй.)

(Уодзæнæй ма)

МАЛХЪАРТИ Нателлӕ

Журнал «Ирæф»-æй ист.