Номерӕн

       

     Хуарз адӕймаг ӕрмӕст бийнонтӕн нӕ рамӕлуй. Ӕхсӕнадӕй ӕ фӕгъгъуд дзиллити зӕрдити дзӕвгарӕ рӕстӕгути ниууадзуй арф фӕд. Бустӕги ба ма еци адӕймаг ӕригон, цардмондаг, ӕгасей уарзон, хуӕрзуод ку фӕууй, ӕ берӕ рӕсугъд федӕнмӕ бӕллецтӕ ӕма фӕндитӕ ӕрдӕг надбӕл ку раскъунунцӕ ӕгъатӕр хъисмӕти карз тӕрхони цӕфӕй.

Гъе уӕхӕн ӕверхъау фӕдеси хабар аци анз, 21 январи, сӕумӕ раги, ӕрвнӕрӕгау райгъустӕй Чиколай цӕргутӕбӕл дӕр - ӕнай-ӕнойти ӕ кустӕй банцадӕй 48 анздзуд силгоймаг, дууӕ бӕдолей мадӕ, цардӕмбали федар усхъӕ, уарзӕгой хуӕртӕ ӕма ӕнсувӕрти боц хуӕрӕ, ниййерӕг мади фӕлмӕн къохӕмбӕлд нӕ базонӕг Айдарти - Цӕрикъати Беллӕ Владемури кизги урух зӕрдӕ. Хъӕбӕр ӕнӕбари, ӕ дууӕ бӕдолемӕн «хуӕрзбон» разӕгъун дӕр нӕбал бафӕразгӕй, ӕностӕмӕ Беллӕ ӕрӕхгӕдта ӕ рӕсугъд ходгӕ цӕститӕ. Ранӕхстӕр ӕй «…фӕццо ӕма мабал ӕрцой» фӕндагбӕл.

   Беллӕ райгурдӕй 24 октябри, 1974 анзи, Чиколай гъӕуи. Фал нӕбал бацийнӕ кодта мадӕ ӕ бӕдолӕбӕл, нӕй ӕрбатухта ӕ гъар гъӕбеси, нӕй бафсаста ниййерӕги реуи уорс ӕхсирӕй. Ӕртӕ сувӕллоней, ӕртӕ кизгей мадӕн нӕ батӕрегъӕд кодта карз мӕлӕт, раскъудта ин уомӕн дӕр ӕ цард ӕнафони ӕфхъӕдӕй нӕбал рахезгӕй.

   Фал, фӕууй царди медӕгӕ изӕди хузӕн адӕмтӕ. Уонӕй разиндтӕнцӕ сабийти фиди ӕнсувӕри уосӕ – Фадзауон Фатъиймӕт ӕма ӕ кизгӕ Лидӕ дӕр, кӕцитӕ некӕд бауагътонцӕ сувӕллӕнттӕн мадӕ имисун. Цъеугун каркау сӕ фӕлмӕнзӕрдӕ Фатъиймӕт бакодта ӕ «гъар базурти буни». Хуӕздӕр цидӕр адтӕй бийнонти царди медӕгӕ, уони ӕхе берӕ сувӕллӕнтти разӕй дӕр кодта седзӕртӕн. Уӕлдай боц хаст цудӕй Беллӕ. Ӕма байрӕзтӕй дзӕбӕхдӕр фӕсевӕди ӕхсӕн ахури, ӕгъдауи фӕнзуйнаг, кӕдзос ӕма хуӕрззӕрдӕ, хуӕрзӕгъдаугинӕй. Скъола фӕууни фӕсте ба бацудӕй уӕлдӕр скъоламӕ - гъӕууон хӕдзарадон иститутти экономикон факультетмӕ. Фӕстӕдӕр ба ма райста цалдӕр уӕлдӕр ахуради дӕсниӕдтӕ.

     Иссирдта ӕ амонд Беллӕ Айдарти Хизири фурт Марати хӕццӕ. Рацудӕй син дзӕбӕх дууӕ бӕдоли - биццеу ӕма кизгæ. Ӕригон дууӕ цардӕмбали федӕнмӕ нивазтонцӕ рӕсугъд фӕндитӕ, гъомбӕл кодтонцӕ сӕ сабийти сӕхе хузӕн хуӕрзӕгъдау ӕма адӕмуарзонӕй.

Беллӕ берӕ ӕнзти фӕккуста Ирӕфи райони Территориалон ӕвзарӕн къамиси бӕрнон бунати. Райста ма, фӕсаууон ахур кӕнгӕй, програмисти дӕсниадӕ. Фӕстаг рӕстӕгути ба ӕнӕхийнӕ фӕллойнӕ кодта нӕ райони администраций информацион хаййади сӕргълӕууӕгӕй. Ӕма, кӕмидӕр адтайдӕ, ӕ архайд хаста ӕрмӕст уӕлдӕр къӕпхӕни агкаг. Ходгӕ цӕстӕ, хуӕрззӕрдӕ, багъӕуаги ӕнхуси къох дарагӕ, хуӕдӕфсӕрмӕ, дӕсни специалист, бийнонти артдзӕсти рохс хори тунӕ – уӕхӕнӕй базудтонцӕ Белли адӕм ӕма ин кӕнгӕ дӕр кодтонцӕ устур аргъ. Сӕ зӕрдити дӕр ӕностӕмӕ баизайдзӕнӕй ӕма цӕрдзӕнӕй уӕхӕнӕй берӕ ӕнзти медӕгӕ.

Цӕуй рӕстӕг…. 2 - аг мартъий, цуппӕрӕни, ба ӕнхӕст кӕнуй дууинсӕй бони Белли ӕнафони байсӕвдбӕл. Имисунцӕй рӕсугъд уодиконди хӕццӕ ӕ бийнонтӕ, е ʹмкосгутӕ, кадӕр ӕй зудта, етӕ. Нӕййес уӕхӕн бон, ӕ мади бӕдӕлдтӕ Валя ӕма Ларисӕ содзгӕ цӕстисугӕй кӕд не ʹрӕхснунцӕ сӕхе Белли ӕнафони байсӕвди тӕрегъӕдӕй. Фал нӕййес ӕнӕмӕлгӕ дуйней, зӕгъгӕ, загъдӕн баизадӕй нӕ рагфиддӕлтӕй. Рохсаг зӕгъунӕй уӕлдай неци ӕй нӕ бон еунӕг Хуцауи дзурдӕй. Ӕма рохсаг уо, Беллӕ, де ʹносон бунати! Дзенети ахил уо!

   Цӕрикъати бийнонтӕ ба арфӕ кӕнунцӕ еци еугур адӕмӕн, синхбӕстӕн, сӕ зинӕй син устур хай кадӕр райста, уонӕн. Уӕлдай хъӕбӕрдӕр - Ирӕфи райони администраций еугур косгутӕн, сӕ сӕргъи Гъуцъунати Казбек ӕма Лагкути Омари хӕццӕ, сӕ устур ӕгъдау ӕма адӕймагдзийнадӕ равдисти туххӕй. Арфӕ кӕнунцӕ Цӕрикъати бийнонти хуӕрзуод ӕма хуӕрзӕгъдау киндзӕ Хъизинти Сослӕнбеги кизгӕ Зӕлинӕн, ӕ уӕлдай ӕгъдау ӕма уодвӕллойнӕн, ӕма игъосун дӕр кӕнунцӕ Белли 40 боней садахъа ке уодзӕнӕй цуппӕрӕни, 2-аг мартъий, Чиколай гъӕуи, Махъой - фурти номбӕл гъӕунг 49-бӕл.

  

                               Гъигӕзӕрдӕ бийнонти номӕй

                                                                           Чихтисти Р.