Цард бацæрун æнцон нæй. Мадта адæми агкаг исун ба уомæй зиндæр. Гъæуй, фиццагидæр, фиддæлти æгъдаубæл хуæст ун, ци фæткитæ нин байзадæй, уони æнхæст кæнун, уой хæццæ ба адæмуарзон, цæстуарзон ун. Алке еци еугур домæнтæн нæ исхъаурæ кæнуй. Фал фур фудевгед ба нæй нæ дзиллæ уæхæн адæмтæй. Зæгъæн, Хæзнидони цæрæг Сехъоти - Сосранти Таисæ Гугой кизгæ кади агкаг æй нæ гъæубæсти æ берæ хуарз менеугути фæрци. Æ уодигъæдæ –раст арвæй лæвæрдау. Цума æ фалæмбулай цæргутæн æнхус кæнунмæ æрвист æрцудæй Таисæ а-зæнхæмæ, кæд мæмæ фулдæр хатт уотæ нæ фæккæсуй. Тухст уавæри бахауæгмæ æ къох бадардзæй, фæккæссæй, куд фæззæгъунцæ, дзурдæй дæр æма гъуддагæй дæр. Ка’й зонуй, æма æхуæдæг зинтæ ке бавзурста ма е ци æй, уой ке зонуй, уомæ гæсгæ. Æвæдзи ба кæдзос зæрдæй дингæнæг ке’й, уомæ гæсгæ. Куддæр ку уа, уæддæр Таисæ æй æцæг дигорон, нæртон ке фæххонунцæ, уæхæн силгоймаг. Некæд рахатта æхе æнхусгъæуагæ адæмæй. Æхсæнади астæу фæнзуйнаг алцæмæй дæр, бустæги æригон киндзитæн, кизгуттæн. Сæрдæр куд загътон, уотæ пусулмон дин хæссуй, мæрдæртайæг ахид фæууй, еʹуæнгти хъаурæ нæ бавгъау кæнуй, гъуддаг æрцæуй уагбæл хаст. Уотæ – цийни тургъи дæр æхе хеуонæй, цæстуарзонæй бавдесуй.

Таисæ раги байзадæй седзæргæсæй. Æ цардæмбал, Сехъоти Даболай фурт Сосланбеги хæццæ хастонцæ цуппар сувæллони. Сосланбег ку фæззиан æй, уæд Таисæмæ еци лæгигъæдæ разиндтæй, ма бундор фæккеун нæ бауагъта. Æ дууæ биццеуи ма дууæ кизгей еуи хузæн исхаста, етæ абони æнцæ æхсæнадæн пайдахæссæг. Сæ мадæн кадæ кæнунцæ, сæ кæстæртæ ба ин –лæггадæ.

Мæ ацибони уацхъуд кæбæл æй, е райгурдæй 1937 анзи 4-маг мартъий. Абони мæ уой фæдбæл уæдта силгоймæгти бæрæгбон 8 мартъий фæдбæл дæр фæндуй раарфæ кæнун Сехъоти Таисæн. Цæрæ ма нин берæ æнзти, уомæн æма нæ гъæуи федауцæ дæ. Дæ кæстæртæмæ дæ зæрдæ рохс кæнæд. Æнæнездзийнадæй ба хайгин уо!

Гобети Нинæ