Не ʾгъдӕуттӕ, нӕ фӕткитӕ

             

 Лезгори гъӕуӕй берӕ фӕрнгун адӕмтӕ рацудӕй нӕ Иристони алли рауӕнтӕмӕ, кӕцити еудадзугдӕр ивазуй сӕ фиддӕлти зӕнхӕбӕл нӕуӕгӕй нифсӕрунмӕ. Ци хъӕбӕр ӕхцӕуӕн фӕууй, еци гъуддаг адӕймагӕн ку бантӕсуй, уӕд. Фал ин уомӕн алли анз дӕр, маййи мӕйи дугкаг авдисӕри, фӕууй хуарз рӕуагӕ – лезгойрӕгтӕ ардӕмӕ, сӕ минкъий райгурӕн уӕзӕгмӕ, ӕрцӕунцӕ, ци цитгин Нигколай изӕдӕн фидӕй-фуртмӕ кувтонцӕ сӕ рагфиддӕлтӕ, уой ном бабӕй рӕсугъд кувдтитӕй иссерунмӕ.

   Кӕд рӕстӕг хуӕнхбӕсти анзи еци афони бустӕги гъар нӕма фӕууй, уӕддӕр имӕ, равгӕ кӕмӕндӕр фӕууй, етӕ ӕрцӕунцӕ хъӕбӕр зӕрдӕй, цийнӕгӕнгӕ, кӕддӕр сӕ сувӕллони бонтӕ кӕми ӕрвистонцӕ, еци рауӕнтӕ фӕууинунмӕ ӕма кӕрӕдзебӕл фӕццийнӕ кӕнунмӕ, зӕрдӕй-зӕрдӕмӕ царди уагӕбӕл фӕххабӕрдтӕ кӕнунмӕ.

    Незамантӕй ардӕмӕ дӕр алли коми цӕргутӕн дӕр адтӕй сӕхе изӕдтӕ ӕма сӕмӕ ковгӕ дӕр кодтонцӕ алке ӕхе рӕстӕги ӕма ӕхе ӕрдигонау.Фал анзи медӕгӕ ба сӕ изӕди хаймӕ, фиццагидӕр – маййи мӕйи баковунцӕ лезгойрӕтӕ, иннӕ гъӕутӕ ба фӕстӕдӕр – июнь, июль ӕма августи мӕйти.

Нӕ хестӕртӕй куд игъосгӕ ӕрцудан, уомӕ гӕсгӕ, цӕветтонгӕ, Лезгори гъӕуи цӕрӕг Бетанти лӕхъуӕн бахаудтӕй уацари цидӕр фудгӕнгутӕмӕ. Етӕ ибӕл бакодтонцӕ хъадаматӕ ӕма ӕй нихгӕдтонцӕ кӕмидӕр лӕгӕти. Цӕйбӕрцӕ си фӕцайдӕ, каʾй зонуй, уӕдта имӕ еу ӕхсӕвӕ ӕрбайгъустӕй нӕлгоймаги дзурд, мӕ фӕсте рацо, зӕгъгӕ. Бетани - фурт имӕ дзоруй, зӕгъгӕ, кутемӕй рацӕуон, баст дӕн. Уӕд бабӕй имӕ еци гъӕлӕси уагӕй дзурдӕуй, зӕгъгӕ, ӕз дин зӕгъун, исистӕ ма мӕ фӕсте рацо.Бетани - фурт равзурста исистун, ӕма, дессаг - ӕ хъадаматӕ ӕрхаудтӕнцӕ. Ранӕхстӕр ӕй Бетани - фурт, мадта ма ци, ӕнӕзонгӕ лӕги фӕсте. Лезгори сӕрмӕ, гъӕу кумӕ зиндтӕй, уой уӕнгӕ фӕццудӕнцӕ, уӕдта имӕ ӕ хуӕрзгӕнӕг дзоруй: «Ардигӕй ба над дӕхуӕдӕг иссердзӕнӕ, тас дин нецӕмӕй бал ӕй». Уотемӕй рахецӕн ӕнцӕ кӕрӕдземӕй ӕма ма ӕй Бетани - фурт бафарста: «Ка дӕ, мӕ хуӕрзгӕнӕг?» Е ин дзуапп равардта: «Мӕнӕ аци бунат багъуди кӕнӕ, ами алли анз дӕр Нигколай ном иссерисӕ».

    Бетанти исӕвддзаг гъӕумӕ ку ӕрбацудӕй, уӕд ибӕл гъӕуггӕгтӕ фӕццийнӕ кодтонцӕӕма син е дӕр ӕ дессаги хабар ӕнӕ ракӕнгӕ кӕми нӕ фӕцайдӕ. Уӕдӕй фӕстӕмӕЛезгори цӕргутӕ алли анз дӕр райдӕдтонцӕ кӕнун Нигколай кувд, ци рауӕнмӕ байамудта ӕнӕзонгӕ лӕг, уоми. Уӕдӕй нурмӕ дӕр еци фӕткӕ баизадӕй ӕнӕййивд, ӕма Лезгори адӕм идарддӕр дӕр архайунцӕ, цӕмӕй еци ӕгъдау цӕуа фӕлтӕрӕй – фӕлтӕрмӕ ӕности. Кувди рӕстӕги бабӕй иннӕ анзмӕ кувдгӕнгутӕ исӕвзарунцӕ нӕуӕгӕй ӕртӕ лӕги, кӕцитӕ райсунцӕ сӕхемӕ ихӕс радон кувди гъуддӕгтӕ рӕсугъдӕй исӕнхӕст кӕнунмӕ.

   Гъулӕггагӕн, цӕмӕдӕргӕсгӕ Лезгори гъӕуи еци гъуддаг кӕми кодтайуонцӕ, уӕхӕн бунат искӕнун айрӕгити уӕнгӕ неке къохи ӕфтудӕй. Бӕргӕ баунаффӕ кӕниуонцӕ гъуддаг рараст кӕнун ӕма еу азгъунстгонд искӕнун, фал уомӕй идарддӕр ба нӕбал бантӕсидӕ неци. Фарӕ ба аци фарста сӕхемӕ райстонцӕ Дашити ӕнсувӕртӕ Маир ӕма Борик. Сӕ зӕрдӕй байархайди фӕрци ковӕндонӕ конд ӕрцудӕй. Лезгойрӕгтӕй ма сӕмӕ беретӕ дӕр, ке бон куд адтӕй, уотӕ се ʾнхуси къох бадардтонцӕ. Уӕддӕр син агъазгъондӕр ӕнхус ба, арӕзтадон ӕрмӕгутӕй цидӕр гъудӕй, уонӕй бакодта Лезгорӕй рацӕуӕг мугкаги минӕвар Уанити Авдрӕхмани фурт Хъазбег.Уомӕ гӕсгӕ нӕ бафӕндадтӕй нӕ уарзон райони газет «Ирӕф»-и фӕрци берӕ адӕми арфитӕ  Хъазбегмӕ фӕхъхъӕртун кӕнун. Мӕнӕ етӕ куд зӕгъунцӕ:

   «Дигорон лӕги алкӕддӕр ӕ хуарз гъуддӕгутӕ кадгин кодтонцӕ дзиллити астӕу. Ӕма, Хъазбег, дӕ цӕрӕнбон берӕ уӕд, дӕ хъаурӕ фулдӕрӕй-фулдӕр кӕнӕд. Дӕ кӕстӕрти хортӕй ӕфсес уо алкӕддӕр. Радтаги къох райсагӕй, фӕззӕгъунцӕ. Зонӕн, уомӕй уӕлдай дӕр ма берӕ хуӕрзти бацӕуис адӕнтӕн ӕма дӕ къохти бӕркад ивулӕд еудадзугдӕр. Дӕу хузӕн лезгойрӕгтӕ ба нӕмӕ фулдӕр ӕнтӕсӕд!»

     Хъазбегӕй уӕлдай ба ма адӕм устур арфӕ кӕнунцӕ, еци гъуддаг ке зӕрди ӕрӕфтудӕй ӕма ӕй кӕронмӕ дӕр ка рахъӕртун кодта, еци Дашити ӕнсувӕртӕн, сӕ фарсмӕ ма кадӕр балӕудтӕй ӕнхуси къох бадарунмӕ, уонӕн.

    Мах ба ма,гъӕуи администраций разамунд, уавӕрӕй пайда кӕнгӕй, игъосун дӕр кӕнӕн аци анз Лезгори изӕд - Нигколай кувд, ке уодзӕнӕй 8 маййи, авдисӕри. Уӕ нисайнӕгтӕ радтун уӕ бон ӕй горӕт Владикавкази –Дашити Маирмӕ, Чиколай – Бетрозти Феликсмӕ, Лескени – Бетрозти Славикмӕ. Нисайнаги бӕрцӕ ӕй 1500 соми. Нӕ зӕрдӕ дардзинан, аци анз дӕр бабӕй устур Хуцау ӕма нӕ кадгин изӕди нӕмттӕмӕ баковунмӕ берӕ адӕм ке ӕрцӕудзӕнӕй алли рауӕнтӕй, уобӕл. Уӕдта аци хъӕппӕресӕн ке есхуарз бундор ӕма рахуӕцӕнтӕ нӕ уедӕгтӕ, нӕ фӕткитӕ ӕма неʾгъдӕуттӕ нигки хъӕбӕрдӕр ниффедар кӕнуни гъуддаги, адӕмти астӕу бастдзийнадӕ ӕма лимӕндзийнадӕ, тог – ӕстӕгдзийнадӕ, кӕрӕдзей уарзун ӕма нимайундзийнадӕ нигки федардӕр кӕнуни гъуддаги, нӕ кӕстӕр фӕлтӕртӕмӕ нӕ фиддӕлти ӕгъдӕудтӕ ӕма уодварни хӕзнатӕ ӕнӕййивддӕрӕй радтунмӕ, цӕмӕй етӕ нӕ Дигорӕмӕ исуонцӕ ӕносон цард рӕсугъдӕй хӕссунмӕ, е ба ӕгириддӕр дузӕрдугкаг нӕй.

                                                                         Бетрозти Славик,

Лескени гъӕуи администраций   

сӕргълӕууӕг.

                                                Хузисти: Нигколай ковӕндонӕ

                                                                 Лезгори гъӕуи нури рӕстӕги.

                                                Ӕрмӕг мухурмӕ бацӕттӕ кодта

                   Чихтисти Риммӕ.