Æмкосæги имисгæй

 

Кæрдæгæзмæлæни мæйи (мартъий) адтæй æ райгурæн бон Елхъанти Эльбрусæн (Бурус) Сулеймани фуртæн (Рохсаг уæд. Ци мæрдти бæсти æй, уоми дзенет æ хай).Уой фæдбæл мæ фæндуй нæ райони газетти фæрстæбæл æримисун ма газеткæсгутæн зæгъун, Елхъани - фурт раст адæймаг ке адтæй, дæсни, скъухт дохтир, удта адæнуарзон лæг.

Махæн, еу къуар дохтиремæн райони сæйгæдонæй (Бетрозти М., Тахунти А., Хъожити Т., Елойти И., Бекмурзти Л., Саккати А., Дедегкати Р., Тагъати Т., Цопанти З.) рауадæй косгæ Елхъанти Буруси хæццæ уæртæ раздæр æнзти.Æрæги, еумæ бамбурд уогæй, нæ зæрдитæбæл еци уæззау бон æрбалæудтæй, устур фидбилизæй, цард гъæуагæй, ку фæммардæй Бурус. Хуцауæй ин уæхæн тæрхонгонд адтæй, ма Хуцауи тæрхæнтти нихмæ ба неке бон неци æй.

Еугуремæндæр зунд æй, дохтири кусти рахаст æнæуæгтæ зин ке æй, удта «алке тæрнихи финст»дæр нæй. Цæмæй æцæг дохтир исуай,уой туххæй адæймаги гъæуй берæ менеугутæ: ахуради зонундзийнæдтæ, зæрдхæларун, адæнуарзон, балæдæрундзийнадæ, байанхос кæнунигъуддаг, фæккæсун, лæгмæ дæ «усхъæ бадарундзийнадæ», адæймагæн хуарздзийнадæ искæнун. Еу загъдæй, алцæмæй æнхæст адæймаг.Ма, æвæдзи, Бурусмæ еци хуарзменеугутæ ку нæ адтайуонцæ, уæд дохтири професси нæ равзурстайдæ.

Советон рæстæги медицинон уæлдæр ахурадæ райсун уотæ æнцон нæ адтæй. Хестæр фæлтæртæ гъуди кæнунцæ, еци рæстæг еу бунатмæ сæдæ адæймагей уæнгæ фæууидæ конкурс.Елхъанти Бурусæн ба бантæстæй бахаун медицинон институтмæ. Фиццæгти хæццæ конкурсон экзаментæ радтун. Æнтæстгинæй ахур фæууогæй, æ баллец исæнхæстæй, райста дохтири дæсниадæ… Æхецæн уæхæн уагæ ниввардта, ма адæнæн æнхус кæндзæн, пайда син дæтдзæн сæ незти нихмæ, алли уавæри дæр, алли афони дæр. Равзурста дохтирæн тæккæ уæззаудæр специальность, анестезиолог –реаниматолог (тагъдæнхуси дохтир). Уæхæн специалистмæ гъæуама уа уæлдай устур зонундзийнæдтæ, федар интуици. Гъæуама уа цæхгæрдзийнади «хецау», æновуд. Медицинон техникæ ма аппараттæмæ арæхсæг, тагъд æнхуси хуасти бæлвурддзийнадæ æнæмæнгæ зонæг ма æндæртæ. Æма Бурусæн æ еци дохтири менеугутæ анзæй-анзмææ кусти медæгæ адæнæн хуасийнæ адтæнцæ.

Мадта уæззау операцити фæсте цалдæр бони æма æхсæви сæйги хæццæ байзаидæ, уоххай, ма фæллæгъуздæр уа, зæгъгæ. Кенæ ба æнафони, е æнæкосгæ бæнтти æй байагоргæй, уайтагъд сæйги сæргъи æрбалæууидæ. Берæ рæстæг гъеуотемæй, еунæгæй, фæккуста, куд анестезиолог-реаниматолог.

Федауцæй фæккуста айдагъ хирургон хаййади нæ, æгас сæйгæдони. Алли хузæн незтæй тухст сæйгитæй тагъд æнхусдзийнадæ кæмæн равардта, уонæн сæ нимæдзæ хъæбæр берæй. Зæгъун æнгъезуй, ма «еци дуйнейæй» берети фæстæмæ æрбаздахта. Фиццагидæр е адтæй æ зонундзийнадæ ма æ тагъд архайди фæрци.Арфи дзубандитæ ин ку кæниуонцæ сæйгитæ сæхуæдтæ, сæ хеуæнттæ ма хæстæгутæ, уæдта хъæбæр ниʹфсæрми уидæ. Уома, мæнæн арфæ кæнун нæ гъæуй, зæгъгæ, устур еунæг Хуцау ин байагъаз кодта! Уруссагау Бурус уотæ зæгъидæ: «Любая удача - это заслуга Бога, любой промах-это только моя недоработка».

Сæйгæдони ке хæццæ куста, етæ ин устур аргъ кодтонцæ. Рæсугъд æгъдау æвдиста, ходæзмолæ, фæлмæн, лигъздзурд адтæй. Уæлдайдæр ба федудта æ уоди æууæлтæй. Алкæмæн дæр æ зæрдæ загъта хуарздзийнадæ. Некæд неке зæрдæ фæхходун кодта. Айдагъ дохтири æнхусдзийнадæ нæ кодта, фал ма æнæуой, царди багъæуаги, æндæр гъуддæгти æ хуарз беретæбæл адтæй.

Мадта имæ уой бæрцæ гæдзæдзийнадæ адтæй, «æфсæйнагин» нервтæ, ма мах, æ æмгосгутæ, деси бацæуианæ. Минкъий уа, устур, алке хæццæ дæр æмкарæ куд адтæй!

Æз медицинон институтти студент ку адтæн, уæд нæ, мæ хæццæ ма цалдæр, уотемæй практикæ кæнунмæ æрæрветионцæ нæ райони сæйгæдонæмæ цалдæр анзей медæги. Ма Бурус нæ хæццæ зæрдиуагæй архайдта, амудта нин. Берæ гъæугæ гъуддæгтæ си базудтан, гъуди сæкæнун абони дæр ма. Мæ кусти арæх мæ зæрди æрæфтуйунцæ, бабæззунцæ. Арæх фæззæгъун нуриккон студенттæн, кæцитæ нæмæ æрцæунцæ практикæмæ, уæхæн скъухт дохтиртæ кустонцæ нæ райони сæйгæдони, кæцитæй еу адтæй Елхъанти Бурус, зæгъгæ. Уотæ дæр ма син фæззæгъун, гъома, сумахæн нури рæстæги æнцон дæр æй: ес уин аллихузон информацион фæрæзнитæ, программон гъуддæгтæ, кæцитæй уæ бон «райсун» æй медицинон æнхусдзийнади фарстатæбæл дзуаппитæ, зонундзийнæдтæ.Махæн ба, æригон дохтиртæн, Бурус удта ма уой хузæн зундгонд дохтуртæ адтæнцæ «нæ киунугутæ». Бурус уотæ зæгъидæ, айдагъ дохтиртæ нæ, фал алли адæймаг дæр ихæсгин æй зонун ма радтун фиццаг æнхус. Куд гæнгæ æнцæ, уонæбæл берети, фиццагидæр мæхецæй зæгъдзæн, Бурусисахур кодта. Уруссагау уотæ зæгъидæ: «Сегодня поможешь ты, завтра помогут тебе».

Антоний Кемпинский уотæ загъта, дан, медицини сæйрагдæр, хуæздæрхуасæ æй æхуæдæг – ДОХТИР. Æма Елхъанти Буруси ном иронхгонд макæд æрцæуæд.

Елети Анатолий, Ирæфи райони сæйгæдони дохтир.