Газет «Ирæф»-и юбилеййи кадæн

1975 анзи каст фӕдтӕн скъола. Уӕдмӕ мӕмӕ ӕрӕмбурд ӕй дууӕ тӕнӕг тетради мӕ «ӕмдзӕвгитӕ» ӕма поэмӕ «Седанатӕ». Цал ӕма цал хатти рагъавинӕ уони нӕ райони газет «Ленинон»-мӕ фӕххӕссун, фал уойбӕрцӕ нифс кӕмӕ адтӕй. Æппунфӕстаг нӕ мадӕй фӕндаггаг ракурдтон ӕма еци нифсгун ӕма зӕрдегенӕй редакций тургъи исмедӕг дӕн, фал къӕсӕрӕй медӕмӕ бахезуни нифс ба мӕмӕ нӕ разиндтӕй ӕма мӕ финстити хӕццӕ фӕстӕмӕ рацудтӕн. Надбӕл хъӕбӕр исӕдонуг дӕн ӕма Чиколай гъӕуисӕри тукани ситро балхӕдтон, фӕндаггаг ба мӕмӕ нӕбал адтӕй ӕма Æхсӕрисӕрмӕ фестӕгӕй исдзӕхст ластон.

Дууӕ мӕйей фӕсте бабӕй нӕуӕгӕй балӕудтӕн редакций тургъи ӕма мӕбӕл фембалдӕй Дедегкати Валоди, уӕд уоми куста, ӕма мӕ е медӕмӕ бахудта. Уӕд базонгӕ дӕн газети редактор Гъуцъунати Барис, поэт Кертанти Тӕхир ӕма Икъати Авдули хӕццӕ дӕр ӕма цалинмӕ цӕрон, уӕдмӕти сӕ мӕ зӕрди арфи ӕвӕрдӕй дардзӕнӕн. 1976 анзи ба мин мухури рацудӕй дууӕ ӕмдзӕвги газети. Уӕдӕй абони уӕнгӕ Ирӕфи райони уӕди газет «Ленинон»-ӕн айдагъ ӕ цӕрагӕнӕг нӕ дӕн, фал ин табугӕнӕг дӕр дӕн. Цидӕртӕ мин рауадзионцӕ, цидӕртӕ ба ӕнхӕст кӕронмӕ кустгондбӕл ка не ‘рцӕуидӕ, уӕхӕнттӕбӕл банимаиуонцӕ. Уӕд мин гъулӕг уидӕ, абони ба син арфӕ кӕнун мӕрдтӕмӕ, ке нӕ сӕ рауагътонцӕ, уой туххӕй.

Еухатт ба редакцимӕ ӕригон авторти ӕмдзӕвгитӕ ӕвзарунмӕ горӕтӕй ӕрцудӕй финсгути Цӕдеси уӕди консультант, поэт Цӕрукъати Валоди. Байагурдтонцӕ мӕн дӕр. Уӕди уӕнгӕ ӕз уодӕгас финсӕг мӕ цӕстӕй дӕр некӕд фӕууидтон ӕма имӕ ӕргом кӕсун дӕр не ‘ндиудтон, фал десӕй ба мардтӕн мӕхецӕн. Уотӕ мӕмӕ фӕккастӕй, цума финсгутӕ еугурӕй дӕр уӕхӕн устур гъӕуама уонцӕ асӕй (Валодя бӕрзонд ӕма бӕзӕрхугтӕ арӕзт адтӕй). Мӕ байуантӕ хъӕбӕр никкалдтӕнцӕ – уой асӕ ба ӕз некӕд исуодзӕн, - поэт ми некӕд рауайдзӕнӕй, зӕгъгӕ. Никки ба ма мӕмӕ ӕ устур армитъӕпӕн ку ӕрбадардта ӕма мин мӕ къох ку райста, уӕд бустӕги бампулдтӕн. Уотӕ мӕмӕ фӕккастӕй, цума поэттӕн се ‘гасебӕл дӕр уӕхӕн устур къохтӕ фӕууй. Уӕдӕй абони уӕнгӕ берӕ ӕнзтӕ раевгъудӕй. Ке фӕсмардтон, уонӕн сӕ фулдӕр не ‘хсӕн нӕбал ӕнцӕ: Гъуцъунати Барис, Кертанти Тӕхир, Темурти Валоди, Мӕрзойти Сергей, Чихтисти Тамбий, Хидирти Ехъя, Бичилти Мӕхӕмӕт, Икъати Авдул ӕма иннӕ автортӕ. Уӕллаг син дзенети рӕсугъддӕр бунат исаккаг кӕнӕд.

Уадессагӕй мин неци исаразун бантӕстӕй дигорон ӕвзагбӕл ести зӕрдӕмӕдзӕугӕ уадзимистӕ исаразуни гъуддаги, фал мӕ зӕрди арфи ци рӕнгъитӕ исӕвзуридӕ, уонӕн ба сӕ авдӕнӕуозӕг адтӕй газет «Ленинон». Уӕдта кӕд ескӕмӕй боззаг ӕма арфиаг дӕн, уӕд нӕхе газетӕй. Берӕ автортӕн равардта фӕндаг поэтикон дуйнемӕ рафӕндараст унмӕ, кӕд нин нӕ нӕдтӕ арӕх ӕхгӕдтонцӕ, уӕддӕр. Нӕдӕр нин радиой, нӕдӕр телеуинунадӕй, нӕдӕр республикон мухури оргӕнти на ‘дтӕй барӕ лӕвӕрд дигоронау мухур кӕнунӕн. Æрмӕстдӕр нӕхе ӕма Дигори райони газеттӕ, ӕндӕр некуцӕй игъустӕй дигорон ӕвзаги азӕлгӕ зӕл.

Мӕ кари дӕн нур, ӕвзагмӕ рахаст фендӕрхузон ӕй, нур мин мӕхемӕ хӕссунцӕ сӕ ӕрмӕгутӕ автортӕ ӕма, мӕхе мӕгурбӕнттӕ мӕ зӕрдӕбӕл ку ӕрбалӕуунцӕ, уӕд мӕ зӕрдӕ базир-зир кӕнуй.

Табу дин уӕд, нӕхе «Ирӕф», ӕ рӕстӕги махбӕл ка нӕ ратегъӕ кодта ӕхе, мадау нӕбӕл ка бауозӕлдӕй. Газет ӕй райони цардӕвдесӕг, ӕ цӕсгон, ӕ айдӕнӕ ӕма си алкӕддӕр адӕм сӕхе куд уинонцӕ, еци фарнӕ дӕ уӕд!

Колити Витали