Зонундзийнæдти бон

 

Фӕззигон райдзаст бони, урух ӕмвӕзади рацудӕй 4 сентябри Чиколай 2-аг астӕугкаг скъолай дӕр ахури анзи райдӕди бӕрӕгбон. Гъолахъи фӕрдгути хузӕн сабийтӕ, фиццаг хатт скъоламӕ цийнӕгӕнгӕ бакъахдзӕфгӕнгутӕ, аййев дарӕсти уӕлдай рӕсугъддӕр ӕнкъарӕнти ӕфтудтонцӕ ӕрмӕст сӕ ахургӕнгути нӕ, фал ма фӕткӕмӕ гӕсгӕ ардӕмӕ ци берӕ ниййергутӕ ӕма иуазгутӕ ӕрбацӕуй, уони дӕр.

Ӕма мӕнӕ райгъустӕй бӕрӕгбон амонгутӕ – хестӕр кълӕсти ахурдзаутӕ Скъиати Роберт ӕма Хъулати Софии «Ӕгас цоти» гъӕлӕс ӕма фегъосун кодтонцӕ аци бон, куд алли хатт, уотӕ бабӕй уарзон скъола ӕ дуӕрдтӕ рӕдауӕй ке баигон кодта, ӕ исонбони ӕнтӕстгун исун ӕнгъӕлдзау кӕмӕ уодзӕнӕнцӕ еугурӕй дӕр, еци фӕлтӕртӕн. Фӕссидтӕнцӕ, рӕсугъд музыки зӕлти хӕццӕ, федӕни рауагъдонтӕ ке худтонцӕ цитгин линейкӕмӕ, еци фиццаг къласонтӕмӕ, цӕмӕй кадгин уавӕри сӕ фиццаг ахургӕнӕг Гуӕздӕрти Оксани хӕццӕ байахӕссонцӕ, абонӕй фӕстӕмӕ син барӕ ка дӕтдзӕнӕй ахурдзауи ном уӕлиау хӕссунмӕ, еци сӕрмагондӕй цӕттӕгонд бунат. Исони бони рауагъдонтӕ, еуӕндӕсӕймагкъласонтӕ, ба сӕ исбоц кодтонцӕ зӕрдӕбӕлдарӕн лӕвӕрдтӕй, бакастӕнцӕ син аййев ӕмдзӕвгитӕ.

   Ӕрӕгитӕй ардӕмӕ скъолати медӕгӕ фӕткӕ иссӕй Уӕрӕсей туруса, нӕ еудзийнадӕ ӕма райгурӕн бӕстӕмӕ уарзт ӕвдесуни бӕрӕггӕнӕн, бӕрзонд исфӕйлаун кӕнун, кӕций исӕнхӕст кодтонцӕ «кадетти» къласи ахурдзаутӕ. Фиццагкъласонтӕ ба бакастӕнцӕ игъӕлдзӕг ӕма рӕсугъд ӕмдзӕвгитӕ, кӕцитӕбӕл син агкаггонд ӕрцудӕй дӕргъвӕтийнӕ къохӕмдзӕгъд.

    Гъулӕггагӕн, аци анз скъолай директор Дедегкати Зинӕ ӕма ахуради хаййади сӕргълӕууӕг Тауасити Фатими номӕй, объективон анхосӕгти фудӕй - еу минкъий нӕфӕразгитӕ ке кӕнунцӕ, уой фудӕй сувӕллӕнтӕн арфитӕ ракодта гъомбӕлади хаййади сӕргълӕууӕг Махъоти Валентинӕ ӕма загъта абонӕй фӕстӕмӕ ахуради хаййади сӕргълӕууӕги ихӕс райони ахуради управлений рахаст унаффӕмӕ гӕсгӕ ӕвӕрд ке цӕуй скъолай математики ахургӕнӕг ӕма «Точка рости» къӕбинетти сӕргълӕууӕг Баликъоти Фатимӕбӕл.

   Нӕ феронх ӕй Махъоти Валентинӕй арфи дзурдтӕ зӕгъун аци скъолай раздӕрти рауагъдонтӕ Цӕрикъати Алан Назири фурт ӕма Хъарати Ибрагим Рамазани фурти номбӕл, сӕ фӕрци скъолай материалон – техникон базӕ ке фӕгъгъӕздугдӕр ӕй аци анз, етӕ син кебалӕвар кодтонцӕ гъӕугӕ техникон фӕрӕзнитӕ ӕма синтезатор, уой фӕрци.«Ӕма сӕ цӕрӕнбонтӕ берӕ уӕнтӕ хуарз адӕмтӕн.  Нӕ зӕрдӕ дардзинан, абони ахурдзаутӕ дӕруӕхӕн хуарз адӕмтӕй дӕнцӕ ке есдзӕнӕнцӕ федӕни», - загъта  Валя Хамзати кизгӕ.

   Сувӕллӕнттӕн ниййергути номӕй зӕрдиуагон арфитӕ ракодтонцӕ скъолай ниййергути комитетти сӕргълӕууӕг Цӕрикъати Лаймӕ ӕма абонӕй фӕстӕмӕ ахуради хаййади сӕргълӕууӕг Баликъоти Фатимӕ. Сӕ радзубанди кӕд цубур адтӕй, уӕддӕр сӕ зӕрди гъар ӕма сувӕллӕнттӕмӕ уарзт ӕнӕмӕнгӕ гъардта еугурей зӕрдитӕмӕ дӕр.

   Фал алли хуарз гъуддагӕн дӕр ес райдайӕн ӕма кӕрон, ӕма райгъустӕй фиццаг дзӕнгӕрӕг сабурдзийнади номбӕл урокмӕ. Фиццаг къласонтӕ ба арвмӕ исуагътонцӕ сӕ зӕрди сосӕгдзийнӕдти хӕццӕ уӕлдӕфон шартӕ.

   Бӕрӕгбонмӕ ӕрцӕугутӕ ба уӕлдай арфи дзурдтӕ зӕгътонцӕ  скъолай гъомбӕлади хаййади сӕргълӕууӕг Махъоти Валентини номбӕл, ӕ уодвӕллойнӕй алли анз дӕр устур байвӕрд ке бахӕссуй ауӕхӕн ӕма ма берӕ ӕндӕрхузи мадзӕлдтӕ исаразуни гъуддагмӕ, уой фӕдбӕл. Ӕма ӕфтуйӕд ӕ къохи ӕнтӕститӕ, е ’нӕнездзийнадӕ федар уогӕй!

                                                             Чихтисти Риммӕ

    Хузистити: ахури анзи райдӕди бӕрӕгбон Чиколай 2-аг астуæгкаг скъолай.