Зæнхæбæл ци устурдæр тугъд æрцудæй, уордæмæ Цæгат Иристонæй рандæй 95 мин адæймаги. Се ᾿рдæг сæ фиди уæзæгбæл нæбал исæмбалдæнцæ. Фал сæ нæмттæ иронх нæ ᾿нцæ. Алке ном дæр си сугъзæрийнæ дамугъатæй финст æрцудæй историй. Берæ гъæути Фидибæсти Устур тугъди бæгъатæртæн игонгонд æрцудæй циртдзæвæнтæ, мемориалон фæйнæгутæ. Ирæфи райони дæр син ес циртдзæвæнтæ. Уæлахез æма уæлахездзаути номбæл конд æрцудæй уолæфæн парк дæр, кæцими æривардтонцæ Ирæфи районæй хъæбатæри ном лæвæрд кæмæн æрцудæй, уони номбæл. Сæ еу æй Иосиф Юрченко, кæций ном сæрбæрзондæй хæссуй Советтони астæуккаг скъола.  

Сувæллæнттæн сæ ахургæнгутæ, Чегати Клим æма Хуадонти Фатимæ, исаразтонцæ фембæлд ветеранти Совети сæрдар Бетрозти Майрæн, Ирæфи райони Аланти Нихаси сæргълæууæг Гуæцæлти Агубе, Хуасдзаути Тазрет æма Чиколай гъæуи Нихаси сæргълæууæг Таухъазахти Маирбеги хæццæ. Етæ скъоладзаутæн бæстон æрдзурдтонцæ нæ ирон культурæ, традицитæ, æгъдæуттæ æма не ᾿взаг багъæуай кæнуни туххæй ци гъæуй, еци гъуддæгтæбæл. Лæмбунæгдæрæй æрлæудтæнцæ Фидибæсти Устур тугъди темæбæл æма Райгурæн бæстæ уарзун, уой сæрбæлтау цард раттунмæ алли адæймаг дæр, æхе патриот ка хонуй,  йе гъæуама уа цæттæ.  

Сæ дзубандий кæрон балхинц кодтонцæ Чиколай гъæуи Уæлахези паркмæ экскурсийæй. Ами ци бæгъатæртæн ивæрд æрцудæй циртдзæвæнтæ, уони тугъдон фæндæгтæбæл дзурдтонцæ ахурдзаутæн, уомæн æма ирæзгæ фæлтæртæ гъæуама макæд иронх кæнонцæ, ци аргъ фист æрцудæй нæ абони сæребарæ цардбæл – тоги аргъ, уой.

Еци бон алли сувæллон дæр æхецæн райста цидæр нæуæг зонундзийнæдтæ, арф ниссагъæс кодта царди еуæй-еу фарстатæбæл, хатдзæгтæ искодта æ исони бони царди туххæй. Берæ рæстæг ма тезгъо кодтонцæ паркки фæлладуадзæн фæзи æма архайдтонцæ спортивон инвентарбæл.

Бабочити  Э.