Бабочити Руслан,

Уӕрӕсей финсгути

Цӕдеси  иуонг, Цӕгат Иристони адӕмон поэт,

Национ преми «Нарти фӕткъу»-й лауреат, нӕ

республики культури ӕскъухт косӕг.

 

(Текъойти Исай райгурци 80 анзей номерӕн литературон фарс)

              Текъойти  Исайӕн

      1

Фӕррохсаг уо, дзенети фӕббадӕ,

Мӕ лимӕнти тӕккӕ  дзӕбӕхдӕр.

Ци цубур рахаста нӕ сӕнттадӕ,

Ци хъӕбӕр нӕ гъӕуй, ци, дӕ сӕр!

И дуйне ци гъар  адтӕй  де ’нгаси,

Ци рохс адтӕй де’нгаси и цард!

Фагӕ боцконд не’рцудтӕ де’гаси,

Фагӕ рӕвдуд не’рцудтӕ, ме’рдхуард…

Ӕнгъалдтан, уодзӕнӕй ма Исатӕ,

Етӕ дӕр зардзӕнӕнцӕ, дӕуау.

Фӕссайдта нӕ нӕ зӕрдӕ, ме’рвадӕ,

Разиндтӕнцӕ не’нгъӕлтӕ аргъау:

О, нур дӕр игъусуй зари зӕлтӕ,

Хуарз ка заруй, уӕхӕнттӕ ес ма,

Ӕнвӕрсунцӕ адӕм уонӕбӕл дӕр,

Фал сӕбӕл нӕ кӕнунцӕ дес ба…

Неке заруй, неке, дӕу аййевӕн,

Бӕрӕг ӕй, цӕмӕ уотӕ’й гъуддаг,-

Нӕ фӕууй дӕу хузӕнттӕн раййевӕн,

Фӕнзӕн дӕр нӕ фӕууй син удта…

2

Ӕрцудӕй нӕ уалдзӕг, фал и мӕргътӕ

Нӕ  зиннунцӕ хонсарӕй нур ма,

Нӕ  кӕнис ду сӕ хӕццӕ ӕздӕхгӕ

’Ма уомӕн нӕ тӕхунцӕ, цума…

Нӕма  косуй и зӕнхӕ фалдзости,

Нӕ будурти кӕрдӕг – кадавар,

Ду ибӕл ке нӕ лӕууис, уой бостӕй

Нӕбал кӕнуй и мӕрӕ кӕд гъар?

Нӕма тагъд кӕнуй арв идзулунмӕ,

Нӕ  ниррохс ӕй нерӕнги  е’нгас.

Кӕд и хор, дӕу нӕ  уингӕй ӕ бунмӕ,

Нирримахста  ӕхеми ӕ тафс?...

Ӕрцудӕй нӕ уалдзӕг, фал и ӕрдзӕ

Ӕййевуй ӕ дарӕстӕ дзӕндӕл.

Ду, Иса, ӕмгӕс адтӕ ӕ хӕццӕ

Ӕма кӕд дӕумӕ кӕсуй ӕнгъӕл?.. 

                                                                                  2013 анз, 28 апрель.

                                     

Ты ушел…

…Ты ушел и содрогнулась сцена,

Пустотою наполнился зал,

А твоя не торопится смена

И оваций не слышится шквал…

Ты  ушел, а с тобою и шутки,

Доброта и лампада души…

И порой мне становится жутко,

Как в лесной, отдаленной глуши…

Ты ушел безмятежно и просто,

Никому не успев надоесть.

Ты покинул сей мир, как апостол,

Что пронес вдохновенно свой крест…

Херувим – в человечьем обличии,

Не обласканный нами, Иса,

Пусть Всевышний тебя возвеличит,

Да хвалу  воздадут небеса!...

Только сердце пока не готово

Ни смириться с бедой, ни забыть…

И все хочется снова и снова

Одному запереться и выть…

Фӕууидтон дӕ мӕ фуни

Фӕууидтон дӕ мӕ фуни еу бон,

Уосгорау нин адтӕ къӕбӕл арӕзт.

Идзулдӕй, ирд бонау, дӕ цӕсгон,

Ӕрттевӕнтӕ калдта дӕ уорс дарӕс…

Фӕууидтон дӕ мӕ фуни еу бон,

Ду фарстай мӕ, Иса, цӕбӕлдӕрти.

Ӕз дзурдтон, ду худтӕ ӕхсицгон,

Исираида маст ку дӕ зӕрди…

Фӕууидтон дӕ мӕ фуни еу бон,

Дӕ фӕрстӕмӕ лӕудтӕй рӕсугъ адӕм.

Хуцауӕн ӕстудтонцӕ ӕ ном,

Ӕппӕлдтӕнцӕ уомӕн ӕ рӕстадӕй…

Фӕууидтон дӕ мӕ фуни. Ӕд рай

Рӕвдудта нӕ дууей дӕр цъӕх ӕрдзӕ.

Дӕ фӕдбӕл мӕ цӕун нӕ уагътай,

Нӕ кумдтай ӕздӕхун дӕр мӕ хӕццӕ…

Фӕууидтон дӕ мӕ фуни еу хатт,

Нидӕн заргӕй, бадтӕ еуварсгомау.

Ку ракодтон фӕстӕмӕ мӕ над,

Ду никкудтӕ удта сувӕллонау…

Нӕ цӕунцӕ ме’хсӕвтӕ  де’ной,

Мӕ фуни дӕ уинун ӕнӕсцохӕй,-

Фӕззонун, ке рамардтӕ, гъе уой,

Ӕгас ке дӕн, е ба ми  феронх уй…

Текъойти Исай зар

Гъей, зӕгъуй, мӕнӕ, Текъойти Иса,

Зарӕг арӕхи, ци зарӕг адтӕй!

Нӕ гъӕуи, цума, амонди нисан-

Исай рӕуони изӕд ӕрбадтӕй.

Гъей,  мӕнӕ, зӕгъуй, нӕхе Дигорӕ,

Цӕмӕ ниддон ӕй дӕ ходӕндзӕстӕ?-

Нӕ борӕмӕлгъӕ нӕ тӕккӕ цорӕй

Фӕттахтӕй, зӕгъуй, ӕндӕр бӕстӕмӕ…

Гъей, зӕгъуй, мӕнӕ, нӕ бонирадӕ,-

Нӕхе Чикола, ци ниббулгъур ӕй?-

Текъойти Иса, дзенети бада,

Нӕбал низзаруй ӕ цъӕхснаг хъурӕй…

Гъей, мӕнӕ, зӕгъуй, нӕ кусти медӕг

Куд исӕргъувӕн нӕ калд байуантӕ?-

Нӕ размӕ хонӕг, нӕ размӕ седӕг

И сау сигитмӕ ци раги рандӕ’й…

Гъей, зӕгъуй, мӕнӕ, рацӕй нигулгӕй,

Фӕстӕмӕ ’скастӕй и хори цӕстӕ,-

Текъойти Иса, фӕлмӕн  идзулгӕй,

Нӕ медастӕуӕй нӕма рартӕстӕй!

Нӕ хицӕ кӕнӕн и сау мӕлгъӕмӕ,

Куд фӕнди зара  - нӕ нӕмӕ гъаруй,-

Текъойти Иса нӕхе  рӕнгъӕбӕл,

Фиццӕгти хузӕн, гъӕрӕй ку заруй…

***

Неци зонун иннетӕн, мӕнӕн ба ӕнӕуӕгтӕ

Зин зӕгъӕн ӕй, Иса, зин зӕгъӕн ӕй бӕлвурд,-

Мах ан, ӕнӕ дӕуӕй, нӕ бери мӕгур,

Ӕви ӕнӕ махӕй мӕгур дӕхуӕдӕг дӕ?..

***

Нур дӕр мин ку нӕма’й, ку лӕдӕрди,

Ӕндӕр адтӕй ӕви дӕ дуйней?-

Уалемӕй куд хастай нӕ дӕ зӕрди,

О, уарзун куд фӕразтай уалей?

Ӕхцул адтӕ, цийнон ӕнӕбӕрцӕ,

Ӕнсувӕр нӕ худтай, хуӕрӕ дӕр.

Кӕд дӕ уод фӕххастай ни дӕ хӕццӕ,

Ниууагътай нин дӕ зӕрдӕ уӕддӕр…

Дӕ зартӕ

Худта нӕ цидӕр дӕ фалдзосмӕ,

Худта нӕ дӕ размӕ цидӕр.

Кодта нӕ дӕ зар уодкӕдзосдӕр,

Кодта нин нӕ гъуди ирддӕр.

Баста нӕ дӕ зар кӕрӕдзебӕл,

Кӕрӕдземӕ кодта хӕстӕгдӕр.

Федауцӕ хаста нӕ дуйнемӕ,

Кодта нӕ, кодта, рӕсугъддӕр.

Сурдтонцӕ дӕ зартӕ къӕвдатӕ,

Карз хорти кодтонцӕ фӕлмӕн.

Уарзӕнттӕн ’студтонцӕ сосбатӕ,

Ӕзнӕгти кодтонцӕ лимӕн.

Дӕ зартӕ хастонцӕ ӕфсарӕ,

Хастонцӕ не ’хсӕнмӕ ӕгъдау.

Ниввардта си кӕд уӕхӕн хъаурӕ

Ӕхуӕдӕг Не ’сфӕлдесӕг Хуцау?..

Хастай нистауӕн си, ӕвӕдзи:

«Лӕгӕн ӕ ихӕс ӕй хуарз ун!»

’Ма цӕрун нӕ ниууагътан уой фӕрци,

Нӕ ниууагътан уой фӕрци уарзун…