Хосроти Агубе æма Виктор цæрунцæ Ирæфи райони Чиколай гъæуи. Сæ сувæллонæй райдæдтонцæ игъосун, хе куд дарун гъæуй адæми æхсæн, кæстæр - хестæри æхсæн ци рахастдзийнæдтæ ес, адæймаги ном сæрбæрзондæй хæссунмæ ци гъæуй еу загъдæй, уони. Ма сæ арф æривардтонцæ сæ зæрдити.

Скъолай ма ку ахур кодтонцæ, уæддæр адтæнцæ бафæнзуйнаг кæстæртæ. Нур сæ идарддæри ахур хæссунцæ Дзæуæгигъæуи Институт Управлений юридикон факультетти. Ахур цæуй æнтæстгинæй, архайунцæ куд фулдæр зонундзийнæдтæ райсунбæл. Уолæфти рæстæг ма хуцаубони ба тагъд кæнунцæ сæ фиди уæзæгмæ. 

«Ами уогæй, æрмæст ниййергути къох нæ, фал ма берæ гъуддæгти рарæуæг кæнунцæ синхæнтти къох дæр. Алли гъуддаги дæр æнцæ фæккæсунмæ цæттæ. Сæ цæстæнгас дæр некæд балæкъун кодтонцæ. Сæхуæдæг дæр ма дæ рафæрссæнцæ, мæ анхуси хай дæ ескæми гъæуй, зæгъгæ. Мадта сæ фæлмæн исдзурд дæр берæ хуæрзти аргъ æй. Æз си хъæбæр арфиаг дæн аци дууæ æригон æнсувæремæй. Æнцæ бафæнзуйнаг. Лæдæрунцæ, хестæрæн ци ᾿гъдау дæтгæй, ци кадæ ин кæнун гъæуй. Кæстæрти дæр архайунцæ раст надбæл ивæрунмæ, кæми гъæуа, уоми бауайдзæф кæнунцæ, фæррæдуйунæй бахеззæнцæ сувæллон дæр, се ᾿мхузони дæр. 

Агубе æма Виктор сæхе куд дарунцæ, ци нифс, зунд æма сæмæ хъаурæ ес, куд хуæрзуод æнцæ, уомæй бæрæг æй, устур гъомбæладон куст ке цæуй сæ хæццæ хæдзари. Сæ ниййергутæ Тотраз æма Фатимæ сæхуæдæг дæр æнцæ раст, æнæхийнæ, адæмуарзон. Æма сæ кæстæрти дæр ахур кæнунцæ нæ дигорон æгъдау, хестæрти намус æма кадæ бæрзæндти хæссунбæл, фæнниллæг ун сæ нæ бауадзунбæл», - зæгъуй сæ синхаг Хайманти Альбинæ. 

Мах дæр арази ан Альбини хæццæ. Арфæ кæнæн аци дууæ лæхъуæнемæн, удта сæ раст надбæл ка ивæруй, еци ниййергутæн. Нæ царди уæхæн фæсевæд фулдæр ку уа, уæд нæ исони бон уодзæй рæсугъд æма фæрнæйдзаг.

Бабочити Этери