Литературон къум Будайти Аслæнбек
Уалдзӕг
Ӕрцудӕй бабӕй уалдзӕг,
Фӕззиндтӕй нур цъӕх кӕрдӕг.
Ма фӕууотӕ, ма, ледзӕг,
Гъазетӕ хормӕ цӕрдӕг.
Нӕ уӕситӕ дӕр хезӕн,
Нӕ зонунцӕ, нӕ, ӕфсес.
Ӕркӕсайтӕ уӕхемӕ,
Ци губунтӕ уӕбӕл ес.
Нӕ тӕрсетӕ биндзӕй дӕр,
Зонетӕ ӕрмӕст хуӕрун.
Соретӕ сӕ къӕдзилттӕй,
Нӕма зонетӕ цӕвун.
Бабай хӕццӕ фӕгъгъазун
Цъӕх кӕрдӕгбӕл бонигон.
Рагӕй дӕр баба уарзуй
Бӕгъӕнбадӕй-уалдзигон.
Нур нӕхемӕ тагъд кӕнӕн,
Нана нӕмӕʹнгъӕл кӕсуй,
Игъӕлдзӕгӕй фӕццӕуӕн,
Хор дӕр хуссунмӕ цӕуй.
Нана
Сӕумӕраги нӕ къӕразгӕй,
Цума фуни фӕууидтон,-
Хори тунӕ ӕрбакастӕй,
Мӕ гъӕбесиʹй никкодтон.
Йе мӕ нана ӕрбацудӕй,
Ӕхе мӕбӕл ниттухта.
Ӕнгъӕл кӕсун нӕ багъудӕй,
Ӕ хабӕрттӕ ракодта.
Исхаста нин е нӕ фиди,
Берӕ зинтӕ фӕууидта.
Нӕ ниппурх ан кӕмидӕрти,
Нӕ амондбӕл нин кувта.
Алкӕд уадӕй мах фӕдеси,
Уӕхӕн нана нӕ фӕцӕй!
Арӕх бадтан ӕ гъӕбеси,
Зӕрдирохс ан мах уомӕй.
Фӕлмӕн къохтӕ мӕ ростӕбӕл
Ку ӕрдауй сабургай,
Дес фӕккӕнун ӕ къохтӕбӕл,-
Ӕрдзӕй фӕлмӕн рахаста.
Ирӕфи дон
Ирӕфи дон нарӕг коми
Сур-сургӕнгӕ ивулуй.
Мӕхе уинун еци дони,
Хор си дзӕбӕх ӕрттевуй.
Цъетей бунӕй ӕ райдайӕн,
Уобӕл ма кӕнӕд фӕсмон.
Лигъз будури йӕ байдауӕн,
Хъӕбӕр идард ӕ кӕрон.
Гъӕддаг сирдтӕ ӕ рӕбунти,
Фӕззелунцӕ алли бон.
Бафсадунцӕ сӕ губунтӕ,
Ниуазунцӕ ин ӕ дон.
Цауӕйнон лӕг хебӕраги
Баниуазуй Ирӕф-дон.
Бафӕлладӕй и арф таги,
Нур уолӕфуй ӕ фӕндон.
Лигъдӕй цӕф арс и цӕгатмӕ,
Ервӕзунбӕл архайдта.
Баервазтӕй Ирӕф-донмӕ,
Цауӕйнони расайдта.
-Ирӕфи дон, ду беретӕ
Ӕрхудтай дӕхемӕ раст,
Ма йронх кӕнӕ ду цъететӕ,-
Уонӕй райдӕдта дӕ цард.
Робаси маст
Нӕ дзӕхӕрай даргъ кӕркдонӕ
Фӕтӕн ӕвӕрд, кауӕй конд.
Минкъий уоддӕр ба - ӕрдозӕ,
Уадӕй уоми алкӕд дон.
Идардмӕ дӕр бӕрӕг дардта,-
Федар дуӕрттӕ, къала сӕр.
Робас уобӕл зелӕн кодта,
Дуар не ссирдта, нӕ, уӕддӕр.
Уасӕнги уаст и кӕркдонӕй
Алли бон дӕр игъустӕй.
Мӕстӕй мӕлгӕ, зӕрдӕ ресгӕй,
Робас уобӕлти зилдӕй.
Куйти рӕйун ӕ гъостӕбӕл
Уӕллаг синхӕй ӕрцудӕй.
-Ледзгӕ, робас, къахнӕдтӕбӕл,
И фидбилиз хӕстӕг ӕй.
Фӕццо, робас, нур уӕхемӕ,
Нӕ уодзӕнӕй карки фид.
Ӕркӕсай листӕг дӕхемӕ,
Ци дӕ, уомӕй-фидбилиз.
Хийнӕ робас, тӕрсгӕ-резгӕй,
Сау гъӕдӕмӕ ниццавта.
Ӕ фӕсте ба и сау халон
Листӕг хъурӕй ниууаста.
Фазӕнттӕ
Дууӕʹнсувӕри: -фазӕнттӕ:
Арсен ӕма Арсӕмӕт.
Берӕ сӕмӕ ес гъазӕнтӕ,
Ӕртиккаг ба ӕй Сӕрмӕт.
Фудуаг ӕнцӕ мади цори,
Еу иннебӕл гъӕр кӕнуй.
Ду, дан, ӕгӕр берӕ дзори,
Еу иннемӕн фӕззӕгъуй.
-Уӕ дууӕ дӕр дзӕбӕх айтӕ,
Уарзӕн сумах ӕмхузон.
Ӕскъоламӕ цӕудзинайтӕ,
Хуӕздӕр ма уин ци зӕгъон.
Сӕ фурцийнӕй и фазӕнттӕ
Искафтонцӕ нур рӕуӕг.
Фентъухтонцӕ сӕ гъазӕнтӕ,-
Скъоламӕ, дан, мах цӕуӕн.
Радзурдтонцӕ хабар мадӕн:
-Нанай дзурд дӕр кӕндзинан,
Нур хӕдзари нӕбал бадӕн-
Ӕскъоламӕ цӕудзинан!
Сослани насӕ
Сӕ дзӕхӕрай арф кӕрдӕги
Устур насӕ ирӕзтӕй.
Хори гъармӕ рагфӕззӕги
Исӕрттивта рӕсугъдӕй.
Берӕ бӕркӕдтӕ хонсари
Ирӕзунцӕ сӕ фӕндон.
Ирӕзуй насӕ еуварси,
Сослан ибӕл кодта дон.
Фӕззӕг Сослан ӕвеппайди
Устур насӕ фӕууидта.
Агоруй хӕдзари мади,
Уомӕн хабар радзурдта.
Бауадӕнцӕ тагъд ӕ размӕ,
Сӕ цийнӕн нӕййес кӕрон.
Ӕрлӕудтӕнцӕ наси фарсмӕ,
Нӕбал ӕнцӕ, нӕ, дзурдгъон.
Синхонтӕмӕ бадзоретӕ,
Устур насӕ иссирдта;
Уонӕн хабар радзоретӕ,
Наси хай син дӕтдзинан.
И дзӕхӕрай берӕ адӕн,
Иссӕй насӕмӕ сӕ каст.
Наси фарсмӕ фӕлмӕн бадӕн
Ракодта Сослан ӕваст.
Дестӕ насӕбӕл ци кӕнтӕ?-
Арӕх ибӕл дон кодтан.
Сумах дӕр нӕ бафӕнзетӕ,
Уой туххӕй уӕ ӕрхудтан.