Район архайдта бæрæгбони мадзæлтти
Алли анз дæр 15 маййи Республикæ Цæгат Иристон – Аланий бæрæггонд æрцæуй ирон æвзаг æма литератури бон. Аци анз дæр бабæй арæзт æрцудæй аллихузон наукон, зонунадон, исфæлдистадон мадзæлттæ. Ирæфи муниципалон район дæр фæстаг нæ байзадæй. Берæ цæмæдессаг равдиститæ арæзт æрцудæй скъолати, рæвдауæндæнтти, уæлæмхасæн ахуради Центри, райони библиотекитæ æма культури галауани. Равдиститæ æма фембæлдтитæ поэтти хæццæ, конкурстæ хуæздæр æмдзæвгæ кæсæг маддæлон æвзагбæл, ирон аййев кæфтитæ, зартæ – еци æгас мадзæлттæ æвзурун кæнунцæ ирæзгæ фæлтæрмæ маддæлон æвзагмæ уарзондзийнадæ.
14 маййи скъоладзаутæ дæр, организацитæ æма учережденити косгутæ, æнæуой ке фæндæ адтæй, еци адæм ниффинстонцæ ирон æвзагбæл глобалон диктант. Мах район активонæй байархадта уоми дæр.
Аци анз ци æрмæг финстонцæ «Дууæ Ири», уоми дзурд цудæй ирон адæми еумæйаг истори æма культурон фæдбæл.
Æдеугурæй аци акций архайдта 247 адæймаги: 155 - ахурдзаутæ, 56 - ахургæнгутæ, 20 – уæлæмхасæн ахурадæ æма рæвдауæндæнтти косгутæ, 16 - ниййергутæ. Алкедæр фæндæ адтæй æ зонундзийнæдтæ исбæрæг кæнун æрмæст растфинсуйнади нæ, фал ма æ меддуйне фæгъгъæздугдæр кæнун дæр.
Глобалон диктант финсуни активонæй байархайдта Республикæ Цæгат Иристон – Аланий ахурадæ æма науки министр Алибекти Эллæ, кæци фæббæрæг кодта акций ахадундзийнадæ. «Аци мадзал арæзт цæуй уой туххæй, цæмæй ирæзгæ фæлтæр фулдæр æргом æздахонцæ маддæлон æвзагмæ, фулдæр кадæ ин кæнонцæ, зононцæ ин æ ратæдзæн, нæ рагфиддæлтæмæ ци бæрзонд æмвæзадæбæл ивæрд цудæй, уой иронх ма кæнонцæ, фал архайонцæ æ багъæуай кæнунбæл», - загъта Алибекти Э.
Бабочити Э.