Еу хуæнхти æхсæн разиндтæй берæ сугъзæрийнæ. Адæм си пайда кодтонцæ, ке бон куд адтæй, уотæ. Æ нади фæтгæ ба уотæ адтæй æма си еу скъуддзаги цæун гъудæй хор рафтудæй хорискастмæ (æхсæвæ). Еци нади гæбази хор кæбæл искастайдæ, е ба басодзидæ.
Дууæ синхони бафæндæ кодтонцæ сæхе багъæздуг кæнунбæл. Райстонцæ хуæрдæ, ниуæзтæ, сæхе бафæдзахстонцæ Уасгергибæл æма ниффардæг æнцæ. Сугъзæрийни сæргъи ку 'рлæудтæнцæ, уæд сæ цæститæ цæхæртæ искалдтонцæ, мадта æндæр куд гъæуама адтайдæ. Хестæр рæуæг уаргъ ракодта æма ледзгæ «къах дæ рун бахуæронæй». Лæг æхсæвдзойæй над уайтагъд рацудæй æма еу дони билæбæл бæласи буни сатæги æруолæфтæй, берæ фæххизта е 'мбали, фал некæми зиннуй.
Кæстæр мулк ку иссирдта, уæд æ хурдзин æ билтæй ракалдæй. Нæхстæрбæл æ ходæ фелваста, Хуцаумæ бадзиназта æма уæззау уаргъи хæццæ лоп-лоппæй, ездон æфсæргæй, фæццæуй сæхемæ. Æ цæститæбæл рагъазидæ, куд исгъæздуг уодзæнæй, е. Фал æй уæдмæ хор æрбаййафта, æма сурх пеллонтæ исуагъта, æстæг дæр си нæбал райзадæй.
Устур фæндити нæбал бацудæй, еци мулк нур хормæ байзадæй. Абони дæр ма 'ймæ æ бийнонтæ æнгъæлмæ кæсунцæ, фал... кæми? Етæ дæр ма хормæ æнæдарæгæй байзадæнцæ.
Хестæр адæм рагæй фæдзахстонцæ, æгæр хуæрдæ берæгъæн дæр нæ тайуй, зæгъгæ.