Малити Георгий 140 анзей юбилеййи кадæн
Ирон – дигорон литератури сæрмагонд бунат ахæссуй Малити Геуæргий исфæлдистадæ. Геуæрги – курдиадгин поэт, лирик, финста дигоронау æма уруссагау. Фулдæр æ маддæлон æвзагбæл. Йетæ æнцæ аййев, медесгун, се ʼвзаг адæмон.
Уотæ фæззæгъунцæ, æ дзилли ристæй ка фæрресуй, æ адæми сæрбæл тохгæнгæй æ уод дæр ка нæ февгъау кæнуй, уæхæн курдиатгун поэтæн мæлæт нæййес, зæгъгæ. Ес ин æрмæстдæр райгурæн бон. Æ адæми еци еузæрдион фурттæй еу адтæй игъустгонд поэт, рохситауæг, демократ, гуманист, дигорон æвзаги устур дæсни, зингæ æхсæнадон архайæг æма зингзæрдæ патриот Малити Гадой фурт Геуæрги. «Дигорон литератури бундорæвæрæг Малити Геуæргий поэзи – хорау æрттевуй æма тафс дæдтуй, мæйау уадзуй рохс тунтæ нæ уодти, денгиз æма фордау ин – исусæн, зæнхи къорейау ба е ʼносон æрвон над – орбитæй фæккеуæн нæййес», - загъта Геуæргий туххæй нæ дигорон финсæг Скъодтати Эльбрус.

Геуæргий исфæлдистадæ формæй æй хумæтæг æма федауцæ, æ гъуди ирд æма бæлвурд, йе ʼвзаг рæсог æма рæстдзæвин, йе стих – æнхæст æма зæлланг. Еци менеугутæй æнхæст æма хайгин ке æй, йе ин кæнуй æ поэзи адæмон. Абайти Васо æмбесондæн хаста Геуæргий æмдзæвгити изæлунадæ: «Æрмæст Малийы – фыртæн бантыст, дыгурон ныхас йæ мидæг цы ритмикон фидауц æмæ зарæгон сæрибар зæлынад æмбæхсы, уый æххæстæй раргом кæнын, уый равдисын».
Фал Уæрæсей финсгути Цæдеси иуонг, поэт æма æхсæнадон архайæг, "Нарти фæткъу"-й премий лауреат, Республикæ Цæгат Иристони культури скъухт косæг Бабочити Русланæй хуæздæр неке загъта, мæнмæ гæсгæ, дууæ бундорæвæрæги Геуæрги æма Къостай туххæй: «Къоста æма Геуæрги хумæтæги æмвæрстæ æвæрд нæ цæунцæ нæ национ литератури историй. Дууæ генийæн ци бантæстæй цубур царди, йе некæмæнбал уой фæсте. Цардгъон литературон традици не ʼрæййафгæй, етæ куд исхизтæнцæ Парнаси бæрзондмæ, уотæ неке. Æвæццæгæн, ирон æма дигорон адæммæ æма сæ фиддæлтæмæ мингай, сæдæгай æнзти дæргъи ци медæггон энерги æрæмбурд æй, фал дуйней рохсмæ равдесун ке нæ бафæразтонцæ, уой не ʼсфæлдесæг Хуцау дууæ поэтемæн балæвар кодта. Æма нæ фæррæдудæй – сæ дууæ дæр исарæхстæнцæ еугур адæми номæй исдзорунмæ, æгас дзиллити зæрдæ бавдесунмæ…
Геуæрги гъæздуг литературон фæткитæ не ʼрæййафта, гъæздуг хуми нæ ниггæлста нæмуг, къанаувæди нæ рауагъта дон, фал алци дæр æхецæн гæнгæ рауадæй – хумæ дæр, таугæ дæр, æхсæдгæ дæр. Æма нæ фæттарстæй, æ байуантæ не ʼркалдæнцæ. Айдагъ лирики нæ фескъухтæй, æрмæст уоми не ʼсхизтæй поэзий цъоппитæмæ, фал ма е ʼстур курдиадæ æхе исбæрæг кодта эпикон жанри дæр. Нæ бон уотæ зæгъун æй, æма Геуæргийæй раздæр ирон æма дигорон финсгутæй æ маддæлон æвзагбæл классикон поэмæ ниффинсунмæ æ нифс неке бахаста».
Геуæрги адтæй зæнхкосæги фурт. Райгурдæй 1806 анзи Киристон гъæуи. 1904 анзи каст фæцæй Махчески цуппаранзон дини зилди скъола. Еци анз бацудæй Æридони миссионерон уодварни семинармæ. Исахур си кодта 4 анзи, фал ин аттестат райсун нæ бантæстæй, фæстаг курсæй цохгонд æрцудæй, раззагдæр ахурдзаути хæццæ семинари администраций нихмæ æргом ке дзурдта, паддзахи режим ке фаудта, уой туххæн. Куста ахургæнæгæй Владикавкази хецæн хæдзæртти. Цалдæр анзи адтæй газет «Терек»-и корреспондент.
1917 анзи арæзт æрцудæй парти «Кермен». Йæ ЦК – и фиццаг сæрдарæй æвзурст æрцудæй Малити Геуæрги. Октябри революций фæсте куста Терки облæсти инструкторæй зæнхи комитеттæ аразуни гъуддаги. Уой фæсте куста ахургæнæгæй Дзинагъай, Уорсдони, удта Мостиздæхи. 1924 анзи Берлини рацудæй æ уруссаг уадзимисти киунугæ «Горские мотивы», 1935 анзи ба æ номдзуд «Ирæф». 1937 анзи ахæст ма хаст æрцудæй ГУЛАГ-мæ. Устур поэтæн басæттæн ке нæййес, е нигги дæр ма еу хатт исбæрæг æй Малити Геуæргий карнæй. Нæдæр стонг, нæдæр уазал, нæдæр, сæркъуæртæ ин ци гъезæмæрттæ бавзарун кодтонцæ, етæ, нæдæр ахæстони æмир фæрстæ нæ басастонцæ дигорон литературæ æма литературон æвзаги бундорæвæрæги. Æхе ин маргæ кодтонцæ, уæддæр ма гъуди кодта æ зонгитæ дзæбæхæй куд раервæзонцæ, уобæл. Уомæн æвдесæн æнцæ, НКВД-и архивти ци документтæ байзадæй, етæ.
Байзадæй ин цæуæт: 4 кизги æма 2 фурти. Цæуæти хестæр Зæйрат рамардæй 1991 анзи. Уомæй æртæ анзи фæстæдæр рамардæй Геуæргий бийнойнаг Зæрæда. Æ кæстæр фурт Васо, кæци æ фиди фæсмæргæ дæр нæ бакодта, иссæй зундгонд ирон поэт.
Бæрцæй берæ нæй Геуæргий лирикæ. Парахат нæй æ тематикæ дæр. Фулдæр си ес интимон сагъæстæ. Фал ин æцæгæлон нæ адтæнцæ социалон фарстатæ дæр. Æ фиццагдæр уадзимистæй еу исхудта «Цъифæ рæстæги». Æвдист си цæуй æнæбарæ, æфхуæрд адæми уавæр. Æ сæргонди ес символикон медес – мегъæ, уарун бон æй уæди доги рæстæги еумæйаг фæлгонц. Уæхæн уавæрти адæймаг æй æфхуæрд, æ цардæн бæлвурд нисан нæййес æма зæнхæ нæмуй золкъæйау. Фал кæд æхемæ кæсуй æнæбон, зæнхæ дæр ин мисти къахæй нецæййагдæр æй, уæддæр нæ мæлуй æ бæллец, рохс ин кæнуй æ зунд, разæнгард æй кæнуй цæргæсау тæхунмæ.
Æ программон æмдзæвгæ иссæй «Федог». Геуæргийæн æ социалон нисан æй: тари сæребарæ иссодзун, мегътæ фæссорун, цæмæй цард мабал уа гъезæмарæ. Æ этикон нисан æй нифс æма лæгдзийнадæ уарзун, хуарз гъуддæгтæ æма сæребарæ æгъдæуттæй æносон ном скæнун. Цард догъ æй, æма ходуйнаг æй уоми фæстаг ун. Рохсмæ тундзун, арвмæ мæсуг амайун, хормæ фæндаг искæнун – етæ æнцæ поэтæн зунд, аййевадæ æма исфæлдистади символтæ, уонæй адæймаг гъæуама уа хайгин. Хайгин си адтæй Геуæрги æхуæдæг дæр. Искодта æхецæн æносон ном.
Æрмæст æ кадæнгитæ «Дзандзирахъ», «Гъонгæси фурт мæгур Мæхæмæт», «Гудзуна», «Уæхæтæги фурт мингий Гуйман», «Темур – Алсахъ»-и ци арф гъудитæ æвæрд æрцудæй, ейæ æй устур гъуддаг. Æвдист си цæуй рагон цард. Ами дæр Геуæрги æновуд æй романтизбæл: æ цæстингас ин сæхемæ æздахунцæ истори æма адæмон исфæлдистадæ, æнахур цаутæ æма дессаги хъисмæттæ.
Мæнæ куд зæгъуй Геуæргий исфæлдистади тухæй зундгонд ирайнаг æма ирон æвзæгтæ ертасæг Абайти Васо:
«…Вслушайтесь в эти стихи. Раньше, чем доходит до сознания их смысл, они уже покоряют своим чарующим ритмом и звучанием. Когда читаешь такие стихи, невольно приходят на память слова Белинского, сказанные им о стихе Пушкина: «Что это за стих! Он нежен, сладостен, мягок, как рокот волны, тягуч и густ, как смола, ярок, как молния, прозрачен и чист, как кристалл…». До Малиева на дигорском языке писал выдающийся поэт Блашка Гурджибеков. Богатство его языка изумительно. Но музыку дигорского стиха он ещё не постиг. Немало стихов на дигорском языке написано и после Малиева. Многие из них отмечены несомненным талантом. Но и в них уже не слышится рокот волны. Нет в них и прозрачности кристалла. Видимо, эту тайну, тайну певучего дигорского стиха, Малиев унёс с собой в свою безвременную могилу…».
Далее Васо Абаев вспоминал: «Было лето 1928 года. Я совершал свою первую поездку в Дигорское ущелье. Конечным пунктом моего путешествия было селение Дзинага. Здесь я впервые встретился с Георгием Малиевым. Он работал учителем в сельской школе. Среднего роста, плотного сложения, широколицый, очень смуглый. Я застал его беседующим с сельчанами на Ныхасе. На голове у него была простая серая пастушеская войлочная шляпа. Обут он был в простые осетинские чувяки. Ничем по одежде не выделялся из толпы. Но в этой скромной оболочке простого горца-пастуха скрывался вдохновенный поэт-романтик и великий мечтатель. Он звал молодежь к свету и подвигу».
«Малити Геуæрги финста зин рæстæги, уæззау уавæрти. Еци рæстæги адæмæй беретæ сæхе медæги бампулдæнцæ, сæ нифс, сæ хъаурæ ниммардæй, æргом дзорун нæбал зудтонцæ, нæбал æндиудтонцæ. Алке æхе уоди сагъæс кодта… Фуддогæ, фудзаман æркодта… Фал еугур дзиллæ æмхузон некæд адтæнцæ. Сæ астæу уæхæн лæгтæ разиндтæй, кæцитæ нецæмæ æрдардтонцæ рæстæги æверхъаудзийнадæ æма ин æ коммæ нæ бакастæнцæ, нæ раййивтонцæ сæ алли бони уаг, сæ зундрахастдзийнæдтæ. Раздæр куд, уотæ реуæмбæрцæ, сæрбæрзонд æма нифсгинæй цудæнцæ сæ равзурст надбæл. Арви æрттевагæ æма гур - гури хæццæ æмдзо кодтонцæ. Арв, бæрзонддæр ци бæлæстæ фæуунцæ, уони цæвагæ ке æй фиццагидæр, е дæр си феронх æй. Нæ сæ евдалдæй лæуунмæ æма тæрсунмæ – цард никкæсæ æма искæсæ ке æй, уой лæдæргæй, тагъд кодтонцæ адæймаги ном исцитгин кæнунмæ æма бæрзонд исесунмæ, дуйнемæ федауцæ æрхæссунмæ. Еци ефстаг лæгтæй адтæй Малити Геуæрги дæр – гениалон поэт æма æвзаги дæсни, зингæ æхсæнадон архайæг, революционер æма демократ, рохситауæг æма зингзæрдæ патриот», - финста Бабочити Руслан Малити Геуæргий исфæлдистади туххæй ци монграфи ниффинста, уоми. Аци зæгъдтитæбæл бафтаун нецибал гъæуй, махмæ куд кæсуй, уотемæй.
Бабочити Этери